जनतापत्र,मेलम्ची सिन्धुपाल्चोक ।
सामाजिक उत्थान कार्यक्रम सञ्चालन समिति (सुप) अन्तर्गतका विभिन्न स्थानीय समितिहरूले आजदेखि मेलम्ची खानेपानी विकास समिति, केन्द्रीय कार्यालय काठमाडौंमा ताला बन्दी गरेका छन्।

ह्योल्मो–सिन्धु उपत्यका सामाजिक उत्थान कार्यक्रम सञ्चालन समिति, याङ्री–लार्के स्थानीय सरोकार समिति, इन्द्रावती–मेलम्ची सामाजिक उत्थान कार्यक्रम सञ्चालन समिति र मण्डन उपत्यका सामाजिक उत्थान समाजले संयुक्त रूपमा ताला बन्दी गरेका हुन्।

समितिहरूले आफ्ना माग सम्बोधन नभएसम्म अनिश्चितकालका लागि सम्पूर्ण काम रोक्ने घोषणा गरेका छन्। उनीहरूले मेलम्ची खानेपानी आयोजनासँग सम्बन्धित विकास कार्यमा समुदायको हकहित, क्षतिपूर्ति र सरोकारका विषयमा लामो समयदेखि बेवास्ता गरिएको आरोप लगाएका छन्।

ताला बन्दीका कारण समितिको नियमित प्रशासनिक तथा प्राविधिक कामकाज पूर्ण रूपमा अवरुद्ध भएको छ।