जनतापत्र, सिन्धुपाल्चोक – मेलम्ची खानेपानी आयोजनाको पानी पथान्तरण स्थानीयवासीले रोकिदिएका छन्। हेलम्बु गाउँपालिका–१, अम्बाथानस्थित सुरुङबाट बिहीबारदेखि पानी पथान्तरण बन्द गरिएको हो। मेलम्ची खानेपानी बाढीपीडित संघर्ष समितिले आयोजनाको साइट कार्यालयमा तालाबन्दी गर्दै आफ्ना माग पूरा नभएसम्म पानी पथान्तरण गर्न नदिने अडान लिएको छ।
संघर्ष समितिका उपाध्यक्ष नवराज गुरागाईंका अनुसार यसअघि भएका आन्दोलन र सहमतिहरू कार्यान्वयन नभएकाले पुनः आन्दोलन गर्नुपर्ने अवस्था आएको हो। उनका अनुसार बाढीपीडित, स्थानीय राजनीतिक दल र अन्य सरोकारवालाहरूले संयुक्त रूपमा आन्दोलन अघि बढाइरहेका छन्।
बाढीपीडितहरूले मेलम्ची नदी नियन्त्रणका लागि तटबन्ध निर्माण, जोखिममा रहेका बस्तीहरूको संरक्षण, बाढीअघि बैंक तथा वित्तीय संस्थाबाट कर्जा लिएर व्यवसाय र आवास निर्माण गरेका पीडितको ऋण मिनाहा, बाढीमा मृत्यु भएका परिवारलाई प्रति व्यक्ति १० लाख रुपैयाँ क्षतिपूर्ति, नयाँ घर निर्माणका लागि २० लाख रुपैयाँ अनुदान, स्थानीय सरकारमार्फत खानेपानीको लेवी उपलब्ध गराउने लगायतका माग अघि सारेका छन्।
संघर्ष समितिले आफ्ना १७ बुँदे मागमा ध्यानाकर्षण गराउँदै, ती माग कार्यान्वयन नभएसम्म मेलम्चीको पानी काठमाडौँ पठाउन नदिने चेतावनी दिएको छ। पीडितहरूले “पहिलेका सम्झौता कार्यान्वयन गर”, “मेलम्ची बाढीपीडित जिन्दाबाद”, “पीडितका माग पूरा गर” जस्ता नारासहित प्रदर्शन गरेका छन्।
०८१ असोज २३ गते संघर्ष समिति, गाउँपालिका र खानेपानी मन्त्रालयबीच भएको सहमतिलाई तत्कालीन खानेपानीमन्त्री प्रदीप यादवले समर्थन गरेका थिए। तर, ०७८ असार १ गतेको भीषण बाढीपछि क्षतिग्रस्त घरपरिवारका समस्या समाधानका प्रतिवद्धता अझै पूरा नभएकाले स्थानीयले फेरि आन्दोलन थालेका हुन्।
२१ कार्तिक २०८२, बिहीबार १६:५९
