जनतापत्र, सिन्धुपाल्चोक
ऊर्जा, जलस्रोत तथा सिँचाइ, भौतिक पूर्वाधार तथा यातायात र सहरी विकासमन्त्री कुलमान घिसिङले मेलम्ची खानेपानी आयोजनाको मुहान क्षेत्रमा भइरहेको अवरोध हटाउन पहल गरेका छन्। उनले हेलम्बु गाउँपालिकालाई समस्या समाधानमा सहयोग गर्न आग्रह गरेका हुन्।
विगतमा गरिएका सम्झौताको कार्यान्वयनको माग गर्दै आयोजना प्रभावितहरूले मुहान बन्द गरेपछि काठमाडौं उपत्यकामा खानेपानी आपूर्ति रोकिएको छ। यही अवस्थालाई मध्यनजर गर्दै सोमबार मन्त्री घिसिङले हेलम्बु गाउँपालिकाका अध्यक्ष निमाग्याल्जेन शेर्पासँग समस्या समाधानका विषयमा छलफल गरेका हुन्।
प्रधानमन्त्री सुशीला कार्कीले पनि मेलम्ची खानेपानी आयोजनामा देखिएको समस्या छिटो समाधान गर्न निर्देशन दिएकी छन्। हाल खानेपानी मन्त्रालयको जिम्मेवारी प्रधानमन्त्री कार्कीकै मातहतमा रहेको छ।
मन्त्री घिसिङले सरकार वार्ता र छलफलमार्फत समस्या समाधान गर्न तयार रहेको बताउँदै काठमाडौं उपत्यकामा खानेपानी संकट गहिरिँदै गएकाले विषयमा गम्भीर हुन आग्रह गरे। उनले सरकारले जतिसक्दो छिटो मेलम्चीबाट पानी आपूर्ति पुनः सुरु गर्ने तयारी गरिरहेको बताए।
हेलम्बु गाउँपालिका अध्यक्ष शेर्पाले विगतका सम्झौता सरकारले कार्यान्वयन गर्नुपर्नेमा जोड दिए। उनका अनुसार आयोजनाले लिएको जग्गा तथा घरभाडा, पूर्व ठेकेदार सिएमसीका सामान आपूर्तिकर्ताको भुक्तानी, मेलम्ची बजारदेखि मेलम्ची घ्याङसम्मको सडक निर्माण र सुन्दरीजलमा आपूर्ति हुने पानीको परिमाणका आधारमा बिक्री रकमको २५ प्रतिशत हेलम्बु विकासका लागि उपलब्ध गराउनुपर्ने माग छ।
२०८१ सालको असोज २१ गते तत्कालीन खानेपानीमन्त्रीसँग मेलम्ची खानेपानी बाढीपीडित संघर्ष समिति, हेलम्बु गाउँपालिका र राजनीतिक दलका प्रतिनिधिबीच यस विषयमा सहमति भएको थियो।
२५ कार्तिक २०८२, सोमबार १५:१६
