जनतापत्र,मेलम्ची सिन्धुपाल्चोक ।
सिन्धुपाल्चोक जिल्लाको मेलम्ची क्षेत्रमा अब वातावरणमैत्री सार्वजनिक यातायात सेवा उपलब्ध भएको छ। श्री जय पाल्चोकी यातायात प्रा.लि.ले सञ्चालनमा ल्याएको इभि भ्यान सेवा बुधबार एक विशेष समारोहबीच औपचारिक रूपमा उद्घाटन गरिएको हो। कार्यक्रमका प्रमुख अतिथि मेलम्ची नगरपालिकाका प्रमुख आइतमान तामाङले इभि भ्यान सेवाले यस क्षेत्रका नागरिकलाई सहज, सुरक्षित र भरपर्दो यातायात सुविधा उपलब्ध गराउने विश्वास व्यक्त गर्नु भएको छ ।
उहाँले कम्पनीले नाफामुखी मात्रै नभई सेवामुखी भावना बोकेर अघि बढ्नुपर्नेमा जोड दिँदै नगरपालिकाले आवश्यक सहयोग गर्ने प्रतिबद्धता जनाउनु भएको छ । उपप्रमुख उमा प्रधानले इभि गाडीलाई वातावरणमैत्री परिवहनका रूपमा व्याख्या गर्दै यसले पेट्रोल–डिजेल गाडीमा निर्भरता घटाउने, जलविद्युतको सदुपयोग गर्ने र वायुप्रदूषण नियन्त्रणमा योगदान गर्ने बताइन्।
स्वदेशमै रोजगारी र सम्भावना खोजी गरेर अघि बढ्नु पर्नेमा जोड दिँदै कम्पनीलाई सफलताको शुभकामना दिइन्।
समाजसेवी बालकृष्ण देउजाले यात्रुहरूलाई अधिकतम सुविधा दिने, गुनासो सुन्ने र समाधान गर्दै अघि बढ्नुपर्ने सुझाव दिनु भएको छ । वडा नं ११ का अध्यक्ष चन्द्रबहादुर तामाङले यातायात सेवा नाफामुखी मात्र नभई सेवामुखी बन्नुपर्ने धारणा राख्नु भएको छ । अस्थायी ट्राफिक प्रहरी पोष्टका हवल्दार बिनोदकुमार गिरीले सुरक्षित यात्रा र ट्राफिक नियमको पालना गर्न यात्रु र चालक दुवैलाई अनुरोध गर्नु भएको छ ।
कम्पनीका अध्यक्ष राजन दुलालले हाल मेलम्ची–काठमाडौँ रुटमा सेवा सुरु गरिएको र चाँडै नै मेलम्चीसँगै हेलम्बु, पाँचपोखरी, इन्द्रावती, मण्डन देउपुर र शंकरापुर नगरपालिकामा पनि नियमित सेवा विस्तार गर्ने योजना रहेको बताउनु भएको छ ।