जनतापत्र, सिन्धुपाल्चोक – “मर्यादित सहकारी, समुन्नत समाज“ भन्ने नाराका साथ ६८औं राष्ट्रिय सहकारी दिवसको अवसरमा मेलम्ची नगरपालिकामा विशेष अन्तरक्रिया कार्यक्रम सम्पन्न भएको छ। कार्यक्रमका वक्ताहरूले सहकारी क्षेत्रका विभिन्न विषयमा छलफल गर्दै सहकारीको दिगो विकासका लागि सहकार्य आवश्यक रहेको बताएका छन्।
कार्यक्रममा मेलम्ची नगरपालिकाका उपप्रमुख उमा प्रधानले सहकारी क्षेत्रमा देखिएका समस्या, तिनको समाधान तथा सहकारीको प्रभावकारी व्यवस्थापनबारे छलफल आवश्यक रहेको बताइन्। सहकारी प्रशिक्षण विभागका प्रशिक्षक नवीन मैनालीले सहकारीका मूल्य मान्यता, इतिहास, समस्याहरू तथा समाधानका उपायहरूबारे प्रस्ट्याएका थिए।
त्यसैगरी, नगरपालिकाका प्रशासकीय अधिकृत झपेन्द्रराज खरेलले मेलम्ची नगरपालिकाभित्र रहेका सहकारी संस्थाहरूको अवस्थाबारे जानकारी दिँदै नगरपालिकाले सहकारी ऐनअनुसार काम गरिरहेको बताए। नगर प्रमुख आइतमान तामाङले सहकारीलाई व्यवस्थित र पारदर्शी बनाउन आवश्यक रहेको उल्लेख गर्दै नगरपालिकाले सहकारी क्षेत्रको प्रवद्र्धनमा निरन्तर सहयोग गर्ने प्रतिबद्धता जनाए।
सहकारी संस्थाहरूलाई प्रविधिसँग जोड्ने प्रयासस्वरूप नगरपालिकाको कृषि शाखा प्रमुख अमरनाथ आचार्यले कृषिसम्बन्धी मेसिन तथा उपकरण अनुदानको सुविधा उपलब्ध गराइएको जानकारी गराए। साथै, बागमती प्रदेश सहकारी सचिव तथा जिल्ला कृषि सहकारी संघका अध्यक्ष मित्रलाल चौलागाईंले सहकारीको दीर्घकालीन विकासका लागि आवश्यक कदमबारे सुझाव प्रस्तुत गरे।
मेलम्ची नगरपालिकाका विभिन्न सहकारी संस्थाका अध्यक्ष तथा प्रतिनिधिहरूको उपस्थितिमा सम्पन्न यस कार्यक्रममा सहकारी क्षेत्रको भविष्य, नीति, र समृद्धिका सम्भावनाहरूबारे विस्तृत छलफल गरिएको थियो।
१९ चैत्र २०८१, बुधबार २०:३०
