जनतापत्र, सिन्धुपाल्चोक |

लैङ्गिक हिंसा अन्त्यका लागि प्रविधिको जिम्मेवार उपयोग आवश्यक छ भन्ने सन्देशसहित मेलम्ची नगरपालिकामा सञ्चालन गरिएको लैङ्गिक हिंसा विरुद्धको १६ दिने अभियान २०८२ अन्तर्गतको अभिमुखीकरण कार्यक्रम मंसिर ९ गते सम्पन्न भएको छ। अभियान मेलम्ची नगरपालिकाको आयोजनामा फेयरमेड र मांकसहितका साझेदार संस्थाको सहयोगमा सञ्चालन गरिएको हो।

मंसिर ९ गते सम्पन्न उक्त कार्यक्रम मेलम्ची नगरपालिकाका प्रमुख आइतमान तामाङको अध्यक्षतामा सम्पन्न भयो। कार्यक्रममा उपप्रमुख उमा प्रधान, प्रमुख प्रशासकीय अधिकृत निमेष मिश्र, विभिन्न शाखा प्रमुख, कर्मचारी तथा सरोकारवालाको उपस्थिति रहेको थियो। अभिमुखीकरणमा लैङ्गिक हिंसासम्बन्धी जोखिम, प्रविधिको दुरुपयोगका रूप तथा नियन्त्रणका उपायबारे विस्तृत प्रस्तुति दिइएको थियो।

कार्यक्रममा सहभागीहरूलाई डिजिटल माध्यममार्फत बढ्दै गएको लैङ्गिक दुव्र्यवहार, समुदायस्तरीय जोखिम, प्रतिकार्य क्षमता र स्थानीय तहले सञ्चालन गर्दै आएका सहयोग संयन्त्रबारे जानकारी गराइएको थियो। छलफलका क्रममा लैङ्गिक हिंसा रोकथाममा समुदाय, स्थानीय सरकार, सुरक्षा संयन्त्र तथा साझेदार संस्थाबीचको सहकार्य अपरिहार्य हुनेमा जोड दिइएको थियो।

अभियानअन्तर्गत मेलम्ची नगरपालिकाले विभिन्न सचेतनामूलक कार्यक्रम, अन्तरक्रिया, विद्यालय–केन्द्रित गतिविधि र सामुदायिक संवादमार्फत लैङ्गिक समानता र हिंसा न्यूनीकरणका सन्देश प्रवाह गरिरहेको छ। नगर नेतृत्वले लैङ्गिक न्याययुक्त समाज निर्माण गर्न सबैको सामूहिक प्रतिबद्धता आवश्यक रहेको उल्लेख गर्दै अभियानले स्थानीयस्तरमा सकारात्मक प्रभाव पार्ने विश्वास व्यक्त गरेको छ।