जनतापत्र,मेलम्ची सिन्धुपाल्चोक ।
नेपाल वादो काई कराँते संघ शाखा डोजो मेलम्चीद्वारा आयोजित बेल्ट प्रमोशन ग्रेडिङ कार्यक्रम शनिबार मेलम्ची–१२ स्थित जालपादेवी माध्यमिक विद्यालयमा सम्पन्न भएको छ। कार्यक्रममा मेलम्ची नगरपालिकाका प्रमुख तथा नेपाल वादो काई कराँते संघका केन्द्रीय अध्यक्ष आइतमान तामाङ प्रमुख अतिथि रहेका थिए।

कार्यक्रममा संघका संस्थापक तथा वरिष्ठ प्रशिक्षक होमबहादुर मोक्तान, अन्तर्राष्ट्रिय निर्णायक नारायण मगर, साथै विभिन्न प्रशिक्षकहरूको सहभागिता रहेको संघले जनाएको छ। ग्रेडिङमा जालपादेवी माध्यमिक विद्यालय र इन्द्रेश्वरी माध्यमिक विद्यालयका विद्यार्थीहरूको सहभागिता रह्यो।

परीक्षणको आधारमा ३२ जना खेलाडीलाई ह्वाइटबाट एल्लो, एल्लोबाट ब्ल्यू तथा अरेन्ज गरी विभिन्न स्तरका बेल्ट बढुवा गरिएको प्रशिक्षक मिङ्मार तामाङले जानकारी दिनु भएको हो । कार्यक्रमका प्रमुख अतिथि तामाङले खेलकुदले युवा पुस्तामा आत्मविश्वास, शारीरिक फिटनेस र सकारात्मक सोच विकास गर्न महत्वपूर्ण भूमिका खेल्ने बताएका छन । कराँते जस्तो मार्शल आर्टले समाजमा अनुशासन, नेतृत्व र जिम्मेवारी बोध अभिवृद्धि गर्ने उनको भनाइ थियो।
वरिष्ठ प्रशिक्षक मोक्तानले नियमित अभ्यास र प्रतिबद्धता कराँते सिकाइको मुख्य आधार भएको उल्लेख गर्दै खेलाडीहरूलाई उज्ज्वल भविष्यको शुभकामना व्यक्त गरेका छन । विद्यालयका प्रधानाध्यापक तथा कार्यक्रम अध्यक्ष इन्द्रप्रसाद दुलालले खेलकुदले विद्यार्थीहरूलाई अनुशासन, मिहिनेत र लगनशीलतासँग अघि बढ्न प्रेरित गर्ने भन्दै संघप्रति धन्यवाद व्यक्त गर्नु भएको छ ।