जनतापत्र, सिन्धुपाल्चोक |

मेलम्ची नगरपालिका–१३ स्थित नेपालथोक सामुदायिक वन नर्सरी केन्द्र र नगरपालिका–१२ को आँपघारी सामुदायिक वन नर्सरी केन्द्र एक कार्यक्रममार्फत मंसिर ११ गते सम्बन्धित वडा कार्यालयलाई हस्तान्तरण गरिएको छ। नगरपालिकाको कृषि विकास शाखाको प्राविधिक सहयोग, सब–डिभिजन वन कार्यालय मेलम्चीको समन्वय तथा करुणा ट्रस्ट र रिड नेपालको आर्थिक तथा प्राविधिक सहयोगमा स्थापित दुवै नर्सरी मंसिर ११ गतेदेखि स्थानीय तहको जिम्मामा पुगेका छन्।

हस्तान्तरण कार्यक्रममा रिड नेपालकी परियोजना संयोजक शोभा सुवेदीले नर्सरीहरूमा अम्बा, तेजपात, मसला जात, सुन्तला, धुपी, बुद्धचित्त, पारिजातलगायत दर्जनौँ प्रजातिका बिरुवा उत्पादन भइरहेको जानकारी दिइन्। उहाँका अनुसार नर्सरी सञ्चालनले स्थानीय प्रजातिको संरक्षण, विस्तार र आर्थिक अवसर बढाउन सहयोग गर्नेछ।

कार्यक्रममा मेलम्ची नगरपालिकाकी उप–प्रमुख उमा प्रधान, वडा नं. १३ का अध्यक्ष श्रीराम घोरसैनी, कृषि विकास शाखा प्रमुख अमरनाथ आचार्यसहित जनप्रतिनिधि र कर्मचारीहरूले नर्सरी टनेलको अनुगमन तथा निरीक्षण गरेका थिए। अब हस्तान्तरण भएका दुवै नर्सरीको व्यवस्थापन र संरक्षण सामुदायिक वन उपभोक्ता समितिहरूले गर्नेछन्। स्थानीय तहमै नर्सरी सञ्चालन हुन थालेसँगै फलफूल तथा स्थानीय वनस्पतिको उत्पादन वृद्धि हुने र वातावरणीय संरक्षणमा योगदान पुग्ने विश्वास व्यक्त गरिएको छ।