जनतापत्र,मेलम्ची सिन्धुपाल्चोक ।
मेलम्ची नगरपालिका–९ स्थित श्री क्यौले ठाना आधारभूत विद्यालयमा सोमबार एक दिने निःशुल्क स्वास्थ्य शिविर सम्पन्न भएको छ। उक्त शिविर नव आशा गृह क्लिनिक, काठमाडौँको सहयोग र मेलम्ची नगरपालिकाको समन्वयमा आयोजना गरिएको हो। कार्यक्रमको उद्घाटन मेलम्ची नगरप्रमुख आइतमान तामाङले गर्नुभयो। उद्घाटन गर्दै उहाँले स्वास्थ्यजस्तो संवेदनशील क्षेत्रमा निजी संस्था र समुदायबीचको सहकार्यले उत्कृष्ट उदाहरण प्रस्तुत गरेको बताउनुभयो। उहाँले भन्नुभयो, “नगरपालिकाले पुर्‍याउनुपर्ने दायित्वमा नव आशा गृह क्लिनिकजस्ता संस्थाले हातेमालो गर्नुले समाजमा सकारात्मक ऊर्जा प्रवाह गरेको छ। यस्ता कार्यक्रमहरूले दुर्गम क्षेत्रका बासिन्दा, विद्यार्थी र कमजोर वर्गका नागरिकलाई ठूलो राहत पुर्‍याउँछन्,” भन्दै आगामी दिनमा पनि यस्ता सामाजिक उत्तरदायित्वका कार्यलाई प्राथमिकतामा राखिने प्रतिबद्धता जनाउनुभयो। डा राजु खतिवडा र सजल तवनवाशुको टोलीले सञ्चालन गरेको शिविरमा विद्यालयका विद्यार्थी, शिक्षक, अभिभावक, वृद्धवृद्धा र स्थानीयवासी गरी २८७ जनाले स्वास्थ्य परीक्षण, परामर्श तथा उपचार सेवा प्राप्त गरेका थिए। शिविर विद्यालय व्यवस्थापन समितिका अध्यक्ष पूर्णबहादुर तामाङको अध्यक्षतामा सम्पन्न भएको थियो। कार्यक्रममा वडा नं। ९ का वडाध्यक्ष किरणदीप खड्का, मेलम्ची स्वास्थ्य शाखा प्रमुख परशुराम श्रेष्ठ, स्थानीय अभिभावक तथा समुदायका प्रतिनिधिहरूको उल्लेखनीय उपस्थिति थियो।