जनतापत्र, सिन्धुपाल्चोक ।
माथिल्लो मनाङमा सोमबार रातिदेखि लगातार बाक्लो हिमपात भइरहेको छ। सोमबार राति करिब साढे ९ बजेतिर सुरु भएको हिमपात मंगलबार बिहानसम्म रोकिएको छैन। मनाङको माथिल्लो क्षेत्र पिसाङ ३,२०० मि देखि नार्पाभूमि गाउँपालिका र तिलिचो क्षेत्रसम्म बाक्लो हिमपात भइरहेको प्रमुख जिल्ला अधिकारी नवराज पौडेलले जानकारी दिए। उनका अनुसार सबैभन्दा बढी हिमपात तिलिचो र थोराङ्ला क्षेत्रमा भएको छ। “सदरमुकाम चामेमा वर्षा भइरहेको छ भने माथिल्लो क्षेत्रमा रातिदेखि लगातार हिमपात भइरहेको छ,” पौडेलले भने। चक्रीय अन्नपूर्ण पदमार्ग हुँदै तिलिचो र थोराङ्ला पासतर्फ जाने आन्तरिक पर्यटकलाई हिमपात रोकिएसम्म जहाँ छन् त्यहीँ रोकिन सुझाइएको छ। प्रशासनले पर्यटक र स्थानीयलाई अनावश्यक जोखिम नलिन आग्रह गरेको छ। हाल तिलिचो बेसक्याम्पतर्फ मात्रै ८ सयदेखि १ हजारसम्म नेपाली पर्यटक रहेका छन्। माथिल्लो मनाङमा करिब १ हजार ५ सय र चामे क्षेत्रमा करिब ३ सय स्वदेशी पर्यटक रहेको जिल्ला प्रशासन कार्यालय मनाङले जनाएको छ।