जनतापत्र,काठमाडौं ।
नेपाली कामदारको प्रमुख गन्तव्य मुलुक मलेसियाले त्यहाँ कामदार पठाउने निजी म्यानपावर कम्पनीहरूको संख्या घटाउन नयाँ नीतिगत व्यवस्था लागू गरेको छ। मलेसिया सरकारले यो नीति कार्यान्वयनका लागि १० बुँदे कडा मापदण्ड तय गर्दै, ती मापदण्ड पूरा गर्ने कम्पनीहरूको सूची नेपाल सरकारले पठाउन औपचारिक अनुरोध गरेको छ। मलेसियाको परराष्ट्र मन्त्रालयले क्वालालम्पुरस्थित नेपाली दूतावासलाई कूटनीतिक नोट पठाउँदै सो जानकारी दिएको हो। सो नोटअनुसार, मलेसियाले नेपालबाट हुने कामदार भर्ना र स्थानान्तरण प्रक्रियालाई सहजीकरण गर्न अनुमति प्राप्त निजी भर्ना एजेन्सीहरूको संख्यालाई तर्कसंगत रूपमा सीमित गर्ने निर्णय गरेको छ। यो प्रक्रिया मलेसियाको मानव संसाधन मन्त्रालयले योग्यतामूलक र पारदर्शी छनोट प्रणालीमार्फत लागू गर्ने बताइएको छ। नेपाल सरकारले तोकिएका १० मापदण्ड पूरा गर्ने इजाजतप्राप्त म्यानपावर कम्पनीहरूको सूची सन् २०२५ नोभेम्बर १५ भित्र मलेसियाको मानव संसाधन मन्त्रालयमा पठाइसक्नुपर्नेछ। मलेसिया सरकारले यस नीतिले दुई देशबीचको श्रम आप्रवासनलाई थप रचनात्मक, नैतिक र दिगो बनाउने विश्वास व्यक्त गरेको छ।