जनतापत्र, मधेश

मधेश प्रदेशमा नयाँ मुख्यमन्त्री नियुक्तिको विरोधमा सात दलका नेता तथा कार्यकर्ताहरूले सोमबार प्रदेश प्रमुख सुमित्रा भण्डारीको कार्यालयअगाडि विरोध प्रदर्शन गरेका छन्। प्रदर्शनकारीहरूले मधेश भवन अगाडि नाराबाजी गर्दै ‘संघीयता विरोधी प्रदेश प्रमुखले राजीनामा दिनुपर्छ’ भन्ने माग गरेका छन्।

प्रदेश प्रमुख भण्डारीले संविधानको धारा १६८ (३) बमोजिम एमाले संसदीय दलका नेता सरोजकुमार यादवलाई मुख्यमन्त्री नियुक्त गरेपछि सात दल आक्रोशित बनेका हुन्। यादवलाई स्वागत गर्न मधेश भवन आउने तयारी भइरहेकै बेला सात दलका नेता तथा समर्थकहरूले गेट अगाडि भेला भएर विरोध जनाएका थिए।

यसअघि तत्कालीन मुख्यमन्त्री जितेन्द्र सोनलले विश्वासको मत नलिएर राजीनामा दिएपछि कांग्रेस, माओवादी केन्द्र, नेकपा (एकीकृत समाजवादी), लोसपा, जनमत, जसपा र नागरिक उन्मुक्ति पार्टीले संविधानको धारा १६८ (२) अनुसार नयाँ सरकार गठनको माग गरेका थिए। तर, प्रदेश प्रमुख भण्डारीले सोमबार बिहानै बर्दिवासस्थित होटलमा सरोजकुमार यादवलाई मुख्यमन्त्री नियुक्त गरी त्यहीँ शपथ गराएकी थिइन्।