जनतापत्र, जनकपुरधाम, – मधेश प्रदेश सरकारले स्नातक तह उत्तीर्ण गरी बेरोजगार रहेका युवालाई प्रतिमहिना दुई हजार रुपैयाँ जीवननिर्वाह भत्ता उपलब्ध गराउने तयारी गरेको छ। मङ्सिर ८ गते बसेको मुख्यमन्त्री तथा मन्त्रिपरिषद् बैठकका निर्णय सार्वजनिक गर्न मङ्सिर १० बिहान आयोजित पत्रकार सम्मेलनमा मुख्यमन्त्री सरोजकुमार यादवले यो जानकारी दिनुभयो।

उहाँका अनुसार समयमा पानी नपरेर मधेश प्रदेशका धानबाली सुख्खाग्रस्त भएको र त्यसपछि ‘मेन्था’ को अविरल वर्षाले प्रमुख खाद्यान्नमा ठूलो क्षति पुगेको छ। स्थानीय तहमा क्षतिको विवरण दर्ता गराएका किसानलाई प्रतिकठ्ठा १५ सय रुपैयाँ राहत वितरण गर्ने प्रक्रिया अघि बढाइएको छ। मुख्यमन्त्री यादवले मधेश आन्दोलनका सहिदलाई ‘मधेश रतन सम्मान’ प्रदान गर्नेबारे पदभार ग्रहणकालमै निर्णय भइसकेको र हाल त्यसको कार्यविधि निर्माणको काम भइरहेको बताउनुभयो। यस्तै, विवाहपञ्चमी महोत्सवका सहभागीहरूको स्वागत तथा आवश्यक व्यवस्थापन गर्न उर्जा, सिँचाइ तथा खानेपानीमन्त्री लखन दास तत्माको संयोजकत्वमा चार सदस्यीय समिति गठन गरिएको छ। समितिले जनकपुरधाम–१३ स्थित मणीमण्डप क्षेत्रमा स्वागतद्वार, पण्डाल, खानेपानी तथा भोजन व्यवस्थापन गर्ने जिम्मेवारी पाएको छ।

प्रदेशभर मलको कृत्रिम अभाव, कालोबजारी र वितरणमा देखिने अनियमितता नियन्त्रणका लागि प्रमुख जिल्ला अधिकारी संयोजक रहने जिल्ला मल वितरण व्यवस्थापन समिति तथा स्थानीय तहका समितिलाई सक्रिय बनाइ सघन अनुगमन गर्न सम्बन्धित जिल्ला प्रशासन कार्यालयलाई अनुरोध गर्ने निर्णय पनि बैठकले गरेको छ। कार्यविधि अनुसार तोकिएको समयभित्र मल नउठाउने, वितरणमा ढिलासुस्ती वा अनियमितता गर्ने सहकारी, फर्म वा बिक्रेताको कोटा तत्काल कटौती गरी आवश्यक स्थान वा बिक्रेतामा हस्तान्तरण गर्ने तथा प्रचलित कानुनबमोजिम कारबाहीको प्रक्रियामा ल्याउन भूमि व्यवस्था, कृषि तथा सहकारी मन्त्रालयलाई निर्देशन दिइने भएको छ।

उखु किसानले विगत वर्षदेखि नेपाल सरकारबाट पाउँदै आएको प्रतिक्विन्टल ७० रुपैयाँ प्रबर्धन खर्च चालु आर्थिक वर्ष २०८१/८२ देखि नपाएपछि उत्पन्न समस्याबारे नेपाल सरकारको कृषि तथा पशुपन्छी विकास मन्त्रालयसँग समन्वय गर्न बैठकले अर्को निर्णय गरेको मुख्यमन्त्री यादवले बताउनुभयो। निर्णय सार्वजनिक कार्यक्रममा उर्जा, सिँचाइ तथा खानेपानीमन्त्री लखनदास तत्मा तथा वन तथा वातावरणमन्त्री कन्चन विच्छा समेत उपस्थित हुनुहुन्थ्यो।