जनतापत्र,संखुवासभा ।
निरन्तर वर्षा र हिमपात भइरहेकाले उच्च हिमाली क्षेत्रका पदमार्गमा यात्रा नगर्न जिल्ला प्रशासन कार्यालय संखुवासभाले आग्रह गरेको छ। कार्यालयले एक सूचना जारी गर्दै कात्तिक १५ गतेसम्म मकालु आधार शिविर तथा उत्तरी हिमाली क्षेत्रका पदमार्गमा यात्रा स्थगित गर्न अनुरोध गरेको हो। प्रमुख जिल्ला अधिकारी सिर्जना थपलियाका अनुसार मङ्गलबारदेखि मकालु आधार शिविरसहितका उच्च हिमाली भेगमा लगातार वर्षा र हिमपात भइरहेको छ। सो कारण पर्यटक तथा पदयात्रीहरूलाई उच्च सतर्कता अपनाउन आग्रह गरिएको छ। प्रशासनले निरन्तर वर्षा र हिमपातका कारण बाढी–पहिरोको जोखिम बढ्न सक्ने भन्दै, कुनै पनि आपत्कालीन अवस्था वा विपद्को सम्भावना देखिएमा तत्काल जिल्ला प्रहरी कार्यालय वा जिल्ला आपत्कालीन कार्यसञ्चालन केन्द्रलाई जानकारी दिन पनि आग्रह गरेको छ।