जनतापत्र,मेलम्ची सिन्धुपाल्चोक ।
बिनोद नेपाल स्मृति फाउण्डेसनको छात्रवृत्तिमा मेलम्ची नगरपालिका–११ स्थित श्री इन्द्रेश्वरी माध्यमिक विद्यालयमा इन्जिनियरिङ अध्ययन गरेका दुई विद्यार्थीलाई सम्मान गरिएको छ। कक्षा ९ देखि १२ सम्म प्राविधिक संकायअन्तर्गत सिभिल इन्जिनियरिङतर्फको ‘सब–इन्जिनियर कोर्ष’ सफलतापूर्वक सम्पन्न गरेका विद्यार्थीलाई बुधबार एक कार्यक्रमका बीच सम्मानपत्रद्वारा सम्मान गरिएको हो। सम्मानित हुनेमा मेलम्ची–१० का राजु दनुवार र मेलम्ची–६ की निरुता आचार्य रहेका फाउण्डेसनका सचिव रोहिणिराज नेपालले जानकारी दिनुभयो। फाउण्डेसनले हाल इन्द्रेश्वरीमा इन्जिनियरिङ अध्ययनरत पाँच जना छात्र–छात्रालाई पूर्ण छात्रवृत्ति उपलब्ध गराइरहेको छ। तर, आगामी शैक्षिक सत्रदेखि भने कक्षा ९ मा भर्ना हुने नयाँ विद्यार्थीलाई समेट्न नसकिने उल्लेख गरिएको छ। फाउण्डेसनका संस्थापक अध्यक्ष डा। गंगादत्त नेपालले विद्यार्थीहरूको भविष्य उज्ज्वल बनाउन छात्रवृत्तिमार्फत सहयोग गरिएको बताउनुभयो। उहाँका छोरा बिनोद नेपाल सन् २०१९,२०७६ सालमा उच्च शिक्षा अध्ययनका लागि अमेरिका गएको तीन महिनामै कार दुर्घटनामा परी निधन भएको थियो।
बिनोदको सम्झनामा २०७७ सालमा स्थापना गरिएको यो फाउण्डेसनले त्यसयता निरन्तर सामाजिक कार्यहरू गर्दै आएको छ। अध्यक्ष नेपालका अनुसार, इन्जिनियरिङको उच्च अध्ययन गरेर देशको भविष्य उज्ज्वल बनाउन बिनोदले देखेको सपना अधुरो भए पनि फाउण्डेसनमार्फत त्यो सपना पूरा गर्ने प्रयास भइरहेको छ।