जनतापत्र, सिन्धुपाल्चोक ।
मेलम्ची नगरपालिका–८, केउरानीस्थित जलवाइदेवी माध्यमिक विद्यालयमा “बालविवाह र साइबर जोखिम स् सुरक्षित भविष्यका लागि स्थानीय सरकार, प्रहरी, विद्यार्थी तथा अभिभावकबीच अन्तरक्रिया कार्यक्रम” सम्पन्न भएको छ। लैङ्गिक हिंसा विरुद्धको १६ दिने अभियानअनुरूप ग्रामिण स्वास्थ्य तथा शिक्षा सेवा गुठी तथा रेष्ट पैरवी समूह, सिन्धुपाल्चोकको संयुक्त आयोजनामा कार्यक्रम गरिएको हो।कार्यक्रममा बालविवाहका कारण देखिने सामाजिक तथा कानुनी प्रभावदेखि लिएर बढ्दो साइबर अपराध र सुरक्षित डिजिटल व्यवहारसम्मका विषयमा विस्तृत छलफल गरिएको थियो। रेष्टका जिल्ला कार्यक्रम संयोजक कुमार भट्टराईले बालविवाह नियन्त्रण, लैङ्गिक हिंसा रोकथाम तथा विद्यार्थीमैत्री वातावरण निर्माणका लागि निरन्तर रूपमै यस्ता कार्यक्रम आवश्यक हुने बताउँदै कार्यक्रमको उद्देश्य र आवश्यकता प्रस्तुत गर्नुभयो। त्यसैगरी रेष्ट पैरवी समूह, इन्द्रावती संयोजक जगन्नाथ रिजालले विवाहको कानुनी परिभाषा, बालविवाहका दीर्घकालीन असर, सजायका प्रावधान तथा यससँग सम्बन्धित कानुनी प्रक्रियाबारे अभिभावक र विद्यार्थीलाई जानकारी गराउनुभयो। इलाका प्रहरी कार्यालय मेलम्चीका प्रमुख, प्रहरी निरीक्षक सुकदेव पौडेलले सामाजिक सञ्जालको दुरुपयोग, साइबर बुलिङ, ह्याकिङ, ठगीलगायत पछिल्ला साइबर अपराधका रूपबारे सचेत गराउँदै सुरक्षित डिजिटल अभ्यासबारे व्यवहारिक मार्गदर्शन दिनुभयो। उहाँले साइबर ब्युरोमा दर्ता भइरहेका मुद्दा र सिकाइयोग्य उदाहरणहरू पनि प्रस्तुत गर्नुभयो।विद्यालयका प्रधानाध्यापक सुरेन्द्रबहादुर खड्का तथा शिक्षक सुवास गिरीले विद्यालयमा यस्ता कार्यक्रम प्राथमिकताका विषय रहेको बताउँदै समस्या समाधानका लागि स्थानीय तह तथा सरोकारवालाको निरन्तर साथ आवश्यक रहेको उल्लेख गर्नुभयो। कार्यक्रमका प्रमुख अतिथि मेलम्ची नगरपालिकाकी उपप्रमुख उमा प्रधानले बालविवाह अन्त्य नगरी बालमैत्री वडा घोषणा चुनौतीपूर्ण हुने बताउनुभयो। उहाँले वडा नं। ५ र ८ अझै बालमैत्री घोषणा हुन नसकिरहेको चिन्ता व्यक्त गर्दै विद्यार्थी, अभिभावक, शिक्षक र जनप्रतिनिधि सबैको सक्रियता अपरिहार्य रहेको जोड दिनुभयो।उपप्रमुख प्रधानले स्थानीय तहले लैङ्गिक हिंसा, बालविवाह तथा साइबर सुरक्षाबारे निरन्तर जागरण कार्यक्रम सञ्चालन गर्दै जाने प्रतिबद्धता समेत जनाउनुभयो।कार्यक्रम रेष्ट पैरवी समूहका जिल्ला अध्यक्ष यज्ञ दंगालको अध्यक्षतामा सम्पन्न भएको थियो। अन्त्यमा सहभागी विद्यार्थी, अभिभावक, शिक्षक तथा सरोकारवालाबीच खुला अन्तरक्रिया गरी बालविवाह न्यूनीकरण तथा साइबर सुरक्षा अभियानलाई थप प्रभावकारी बनाउने सहमति व्यक्त गरिएको थियो।