बलेफी गाउँपालिका पूर्ण खोप पालिकाको रूपमा घोषणा
जनतापत्र,सिन्धुपाल्चोक, –

बलेफी गाउँपालिका आजदेखि औपचारिक रूपमा पूर्ण खोप पालिकाको रूपमा घोषणा गरिएको छ। गाउँपालिकाका अध्यक्ष गंगा बहादुर तामाङको अध्यक्षता र उपाध्यक्ष सरु लामा तामाङको विशेष आतिथ्यमा आयोजित विशेष कार्यक्रममा उक्त घोषणा गरिएको हो।

कार्यक्रममा वडा अध्यक्षहरू, कार्यपालिका सदस्यहरू, महिला सामुदायिक स्वास्थ्य स्वयंसेविका, स्थानीय जनप्रतिनिधि तथा बासिन्दाहरूको सक्रिय उपस्थिति थियो। कार्यक्रममा अध्यक्ष गंगा बहादुर तामाङले नियमित खोप सेवाको पहुँच विस्तार र स्वास्थ्य सचेतना अभिवृद्धि गर्न गाउँपालिकाले विशेष पहलहरू गरेका कारण यो उपलब्धि सम्भव भएको जानकारी दिनुभयो। उहाँले बालबालिकाको स्वास्थ्य सुरक्षाका लागि स्वास्थ्यकर्मी, स्वयंसेविका र स्थानीयवासीहरूले देखाएको सक्रियता र समर्पणको प्रशंसा गर्नुभयो।

त्यस्तै, उपाध्यक्ष सरु लामा तामाङले पूर्ण खोप अभियानले गाउँपालिकाको बालस्वास्थ्य सुधारमा सकारात्मक प्रभाव पार्ने विश्वास व्यक्त गर्नुभयो। उहाँले स्वास्थ्य क्षेत्रमा भएको यो उपलब्धिले बलेफीलाई स्वस्थ र समुन्नत पालिका बनाउने दिशातर्फ अग्रसर गराउने बताउनुभयो।

गाउँपालिकाले आगामी दिनहरूमा पनि स्वास्थ्य सेवा सुदृढीकरण, खोप पहुँच विस्तार तथा जनचेतनामूलक कार्यक्रमहरूलाई प्राथमिकता दिने प्रतिबद्धता जनाएको छ।