जनतापत्र,बलेफी सिन्धुपाल्चोक ।
बलेफी गाउँपालिका–४ करङगैरामा रहेको श्री करङगैरा आधारभूत विद्यालयले आफ्नो २६औं वार्षिकोत्सव, अभिभावक भेला र पूर्व विद्यार्थी पुनर्मिलन कार्यक्रम उत्साहका साथ सम्पन्न गरेको छ। समारोहको अध्यक्षता वडा अध्यक्ष तथा विद्यालय व्यवस्थापन समितिका अध्यक्ष सुर्जे तामाङले गर्नुभएको थियो। कार्यक्रममा गाउँपालिकाका अध्यक्ष गंगा बहादुर तामाङ प्रमुख अतिथि रहनुभएको थियो। कार्यक्रममा पूर्व वडा अध्यक्ष काली प्रसाद लामा, जनप्रतिनिधि, छिमेकी विद्यालयका शिक्षक, अभिभावक र पूर्व विद्यार्थीहरूको उल्लेखनीय उपस्थिति देखिएको थियो। वार्षिकोत्सवको अवसरमा विद्यार्थीहरूले सांस्कृतिक प्रस्तुतिमार्फत कार्यक्रमलाई झनै रंगिन बनाएका थिए। परम्परागत र आधुनिक गीत–नृत्यका माध्यमबाट उनीहरूले विद्यालयको वातावरण उत्सवमय बनाएका थिए। सम्बोधनका क्रममा प्रमुख अतिथि तामाङले विद्यालयले गरेको शैक्षिक प्रगतिको सराहना गर्दै गाउँपालिकाको तर्फबाट निरन्तर सहयोग रहने विश्वास दिलाउनुभयो। उहाँले शिक्षक, अभिभावक र पूर्व विद्यार्थीबीचको सहकार्यले मात्र शिक्षाको गुणस्तरमा सुधार सम्भव हुने बताउनुभयो। त्यसैगरी, अध्यक्ष सुर्जे तामाङले विद्यालयको भौतिक तथा शैक्षिक विकासका लागि सबैको साथ आवश्यक रहेको उल्लेख गर्दै विद्यालयलाई नमूना शिक्षालयका रूपमा अघि बढाउने लक्ष्य व्यक्त गर्नुभयो।