सुनिता रखाल , सिन्धुपाल्चोक । नेपाल कम्युनिस्ट पार्टी (एमाले) बलेफी गाउँपालिका कमिटीले आयोजना गरेको जनभेला कार्यक्रम बुधबार सम्पन्न भएको छ । कार्यक्रममा एमाले केन्द्रीय सदस्य तथा सिन्धुपाल्चोक जिल्ला इन्चार्ज सरेश नेपाल प्रमुख अतिथि थिए भने एमाले,बागमती प्रदेश सदस्य तथा सुनकोशी गाउँपालिकाका अध्यक्ष टपेन्द्र तिमिल्सिना र प्रदेश सदस्य विदुर भारती विशेष अतिथि रहेका थिए ।

जनभेलामा प्रमुख अतिथि नेता सरेश नेपालले हालको राष्ट्रिय राजनीतिक परिस्थिति, एमालेको नीति तथा जनजीवनसँग जोडिएका विषयमा मन्तव्य राख्दै पार्टीको मूल धारणा प्रस्तुत गरे । उनले एमाले जनताको पार्टी भएकाले देशभर बढिरहेका अपराधजन्य गतिविधिहरू विरुद्ध खुलेर लड्ने बताएका थिए ।
उनले भने, “एमाले देश र जनताको हितका लागि सधैं अग्रभागमा रहन्छ । जेन्जीको नाममा भएको गलत गतिविधिबाट देशलाई कमजोर पार्ने प्रयासको एमालेले दृढतापूर्वक प्रतिवाद गर्नेछ ।”
उनले आगामी आन्दोलन सत्य, न्याय र सुशासनको पक्षमा हुने उल्लेख गर्दै, “जस्तोसुकै आँधीबेहेरीमा पनि सत्यका पक्षमा उभिने मात्र नेता हो,” भनेर जोड दिए ।

त्यसैगरी विशेष अतिथि टपेन्द्र तिमिल्सिनाले एमाले सधैं राष्ट्रियता, जनजीविका र विकासका सवालमा अग्रसर रहने पार्टी भएको बताए । उनले हालको जटिल राजनीतिक परिस्थितिमा पनि एमालेले नेतृत्वदायी भूमिका निर्वाह गरिरहेको जनाए ।
उनले भने, “एमालेले कहिल्यै पनि देशको स्वाभिमानमा सम्झौता गर्दैन । जनताको मर्मलाई आत्मसात् गर्दै यो पार्टी सधैं राष्ट्रहितमा काम गर्छ ।”

कार्यक्रमको अध्यक्षता गरेका बलेफी गाउँपालिका कमिटी अध्यक्ष नारायणकाजी श्रेष्ठले एमालेको नारा “सुखी नेपाली, समृद्ध नेपाल” साकार पार्न पार्टी निरन्तर जनस्तरमा अभियान सञ्चालन गरिरहेको बताए । उनले एमाले देशभक्त, जनप्रेमी र क्रान्तिकारी पार्टीको रूपमा सधैं उभिने दृढता प्रकट गरे ।
श्रेष्ठले भने, “देश र जनताको पक्षमा काम गर्न सक्ने पार्टी भनेकै एमाले हो । हाम्रो लक्ष्य सुशासन, विकास र आत्मनिर्भर राष्ट्र निर्माण हो ।”

पार्टीका अन्य नेताहरूले समेत जेन्जी आन्दोलनपछिका गलत व्याख्याहरूको विरोध गर्दै एमालेको नीति र दृष्टिकोण स्पष्ट पारेका थिए । उनीहरूका अनुसार राजनीतिक दलहरूप्रति नागरिकमा फैलिएको अविश्वास हटाउन र पार्टीप्रति जनविश्वास पुनःस्थापना गर्न देशभरका ७५३ स्थानीय तहमा एकैसाथ जनभेला सञ्चालन गरिएको हो ।

पार्टी केन्द्रको निर्देशनअनुसार भदौ २३ र २४ गतेको “जेन्जी आन्दोलन” पछि उत्पन्न विभिन्न भ्रम र प्रचारलाई खण्डन गर्दै एमालेले वडा, पालिका र जिल्ला तहसम्म जनसंपर्क अभिवृद्धिका कार्यक्रम चलाएको हो । यसै सन्दर्भमा बलेफी गाउँपालिकामा भएको जनभेलाले पनि स्थानीय जनतालाई एमालेको नीतिगत दृष्टिकोण बुझ्न र पार्टीप्रतिको विश्वास सुदृढ पार्ने अवसर दिएको बताइएको छ ।

एमालेले अबको यात्रालाई संसद् पुनःस्थापना, भ्रष्टाचार नियन्त्रण, सुशासन कायम र विकासमुखी राजनीतितर्फ केन्द्रित गर्ने प्रतिबद्धता जनाएको छ । साथै, पार्टीले आगामी निर्वाचनका तयारीका क्रममा संगठन सुदृढीकरण, जनस्तरसँगको प्रत्यक्ष संवाद र नीति स्पष्टीकरण अभियानलाई निरन्तरता दिने निर्णय गरेको छ ।