जनतापत्र,मेलम्ची सिन्धुपाल्चोक ।
सिन्धुपाल्चोकको पाँचपोखरी थाङ्पाल गाउँपालिका–२, बरुवामा अवस्थित ‘सङ्क क्षेलिङ गुम्बा’मा कङ्ग्युर अक्षय कोष स्थापना गरिएको छ। भूकम्पले क्षतिग्रस्त भएपछि जनश्रमदान र सहयोगमार्फत करिब ३ करोड रुपैयाँ लागतमा पुनर्निर्माण गरिएको गुम्बामा उक्त अक्षय कोष स्थापना गरिएको हो। गुम्बाका प्रमुख लामा छेवाङ ग्याल्वो लामाका छोरीज्वाइँ पुजन थापाको परिवारले स्वर्गीय पिता प्रेमकुमार थापाको सम्झनामा पाँच लाख रुपैयाँ प्रदान गरेका छन्। त्यस्तै रङजुङ लामाबाट एक लाख रुपैयाँको थप सहयोगसहित कुल ६ लाख रुपैयाँको प्रारम्भिक अक्षय कोष स्थापना भएको हो। बरुवाका पूर्व वडा अध्यक्ष पासाङ स्याङबाका अनुसार, उक्त कोषको आम्दानी त्रीपिटकमा समावेश १०८ वटा ठेलीको वार्षिक बाचनका लागि प्रयोग गरिनेछ। हाल सुरु गरिएको कोषलाई आगामी वर्षहरूमा थप विस्तार गर्ने योजना गुम्बा विकास समितिले जनाएको छ। ४८ घर गुठीबाट सञ्चालित गुम्बा करिब १ रोपनी क्षेत्रफलमा निर्माण गरिएको हो। बौद्ध धर्म अनुसारका संस्कार र धार्मिक क्रियाकलापका लागि स्थानीय बौद्ध समुदायलाई लक्षित गर्दै गुम्बा निर्माण गरिएको हो। गुम्बाको पुनर्निर्माण कार्यमा देश–विदेशमा रहेका दाताहरू र स्थानीयवासीको श्रम तथा सहयोग महत्वपूर्ण रहेको समितिले उल्लेख गरेको छ।