जनतापत्र,सिन्धुपाल्चोक ।
चौतारा साँगाचोकगढी नगरपालिका–१४ मा अवस्थित बज्रयोगिनी अपाङ्ग मैत्री सहकारी संस्थाको १३औँ साधारण सभा सम्पन्न भएको छ । साधारण सभाले चतुर बहादुर तामाङको अध्यक्षतामा नयाँ कार्यसमिति चयन गरेको छ । समितिमा उपाध्यक्ष दधीलाल नेपाल, सचिव मिना नेपाल, सहसचिव सगुन बस्नेत, कोषाध्यक्ष ज्यानमाया श्रेष्ठसहित १० सदस्यीय समिति गठन गरिएको छ । साथै, डोकबहादुर बोहोराको संयोजकत्वमा तीन सदस्यीय लेखा समिति र सिताराम बस्नेतको संयोजकत्वमा तीन सदस्यीय शिक्षा समिति पनि चयन भएको छ । कार्यक्रमको उद्घाटन गर्दै वडा अध्यक्ष उद्धब नेपालले सहकारीले अपाङ्गता भएका व्यक्तिहरूको हितमा प्रशंसनीय काम गर्दै आएको उल्लेख गर्दै आगामी दिनमा अझ प्रगति गर्ने विश्वास व्यक्त गर्नुभयो । सो अवसरमा डडुवा भवानी शङ्कर माविका प्रअ बद्री प्रसाद नेपाल, नेत्रज्योती कृषी सहकारीका अध्यक्ष कृष्ण बहादुर नेपाललगायतले शुभकामना मन्तव्य राख्नुभएको थियो । सहकारीका सचिव मिना नेपालले संस्थाको गतिविधिबारे जानकारी गराउनुभयो भने व्यवस्थापक नेत्र बहादुर बस्नेतले सञ्चालन गर्नुभएको कार्यक्रमको अध्यक्षता चतुर बहादुर तामाङले गर्नुभएको थियो ।