जनतापत्र, काठमाण्डौ |

आगामी फागुन २१ गते निर्धारित प्रतिनिधि सभा सदस्य निर्वाचनमा सहभागी हुन राजनीतिक दलहरूले आजभित्र निर्वाचन आयोगमा दर्ता प्रक्रिया पूरा गर्नुपर्नेछ। निर्वाचन आयोगका अनुसार दल दर्ताका लागि मंसिर १ गतेदेखि सुरु भएको समयसीमा आज कार्यालय समय अन्त्यसँगै सकिँदै छ। निर्वाचनमा प्रतिस्पर्धा गर्न इच्छुक दलहरूले तोकिएको मितिभित्र आवश्यक कागजातसहित दर्ता आवदेन बुझाउनुपर्ने आयोगले स्पष्ट गरेको छ। आयोगका अनुसार हिजोसम्म नेपाली कांग्रेस, नेकपा एमाले, नेपाली कम्युनिस्ट पार्टीसहित ८० राजनीतिक दलले दर्ता प्रक्रिया सम्पन्न गरिसकेका छन्। दल दर्ता सम्पन्न भएपछि आयोगले मंसिर ११ देखि १८ गतेसम्म दर्ता भएका दलको छानबिन र आवश्यक रुजु प्रक्रिया अघि बढाउने छ। त्यसपछि मंसिर २० गते निर्वाचन प्रयोजनका लागि स्वीकृत दलहरूको अन्तिम नामावली सार्वजनिक गरिने आयोगले जनाएको छ।