जनतापत्र, काठमाडौँ  ।

विहिवारदेखि अवकाशमा जानुभएका पूर्व प्रहरी महानिरीक्षक (आईजीपी) चन्द्रकुबेर खापुङको विदेश भ्रमणमा रोक लगाइएको छ। भदौ २३ र २४ गतेका घटनासम्बन्धी छानबिनका लागि गठित गौरीबहादुर कार्की नेतृत्वको आयोगले खापुङलाई स्वीकृतिविना काठमाडौं उपत्यका बाहिर जान पनि नपाउने व्यवस्था गर्न सम्बन्धित निकायलाई पत्राचार गर्ने निर्णय गरेको हो।आयोगका प्रवक्ता विज्ञानराज शर्माले जारी गरेको विज्ञप्तिमा उल्लेख भएअनुसार, छानबिन तथा जाँचबुझका क्रममा कुनै पनि समयमा आयोगमा उपस्थित हुनुपर्ने सम्भावना रहेकाले आजदेखि नै उक्त निर्णय कार्यान्वयनमा ल्याइएको हो।यसैबीच, नव नियुक्त प्रहरी महानिरीक्षक दानबहादुर कार्कीले आजै गृह मन्त्रालयमा दर्ज्यानी चिन्ह लगाएर जिम्मेवारी सम्हालेका छन्।यसअघि आयोगले पूर्व प्रधानमन्त्री तथा नेकपा (एमाले) अध्यक्ष केपी शर्मा ओली, पूर्व गृहमन्त्री रमेश लेखकसहित पाँच जनामाथि पनि स्थान हद लगाउने निर्णय गरेको थियो।