जनतापत्र, चौतारा ।
पाठेघरको मुखको क्यान्सर सम्बन्धि प्रारम्भिक जाँच एवं मोतियाविन्दु (आँखा सम्बन्धि ) १ दिने स्वास्थ्य शिविर सम्पन्न भएको छ । चौतारा साँगाचोकगढी नगरपालिका स्वास्थ्य शाखाको आयोजनामा वडा नं ७ स्थित सानोसिरुवारी स्वास्थ्य चौकीमा उक्त शिविर सम्पन्न भएको हो ।
महिला १ सय २५ जना र पुरुष ३८ गरि जम्मा शिविरमा १ सय ६३ जना वडाबासिहरुले सेवा लिएका छन् ।
शिविरमा ६५ जना महिलाहरुको पाठेघरको मुखको परिक्षण गरिएको थियो । जनस्वास्थ्य अधिकृत दिनेश नेपालले आँखा परीक्षणमा १६ जनालाई मोतियाविन्दु भएको पाइएको बताउनुभयो ।

मोतियाविन्दु भएकाहरुलाई नगरपालिकाले आयोजना गर्न लागेको निशुल्क मोतियाविन्दु शल्यक्रिया शिविरमा सेवा लिन नगरप्रमुख कृष्ण प्रसाद सापकोटाले अनुरोध गर्नुभयो ।
मेयर सापकोटाले यस्तै शिविर अन्य वडाहरुमा पनि क्रमश सञ्चालन गर्ने जनाउँदै नगरपालिकाको सबै वडाहरुमा शिविर हुने भएकाले सेवा लिन नगरबासीलाई अनुरोध गरिएको छ ।
नगरपालिकाले फागुन १५ गतेदेखि क्रमश प्रत्येक वडाको तोकिएको स्वास्थ्य संस्थाहरुमा निशुल्क स्वास्थ्य परिक्षण शिविर सञ्चालन गरिएको छ ।
जनस्वास्थ्य अधिकृत नेपालले नगरपालिकाको स्वास्थ्य शाखाको आयोजनामा वडा नं ११ भीमटार आधारभूत स्वास्थ्य सेवा केन्द्र, फागुन १६ गते वडा नं ८ इर्खु स्वास्थ्यचौकी, फागुन १७ गते वडा नं ६ स्थित वडाकार्यलयमा पाठेघरको मुखको क्यान्सर सम्बन्धि प्राथामिक जाँच एवं मोतियाविन्दु आँखा सम्बन्धि निशुल्क शिविर हुने जानकारी दिनुभयो ।
फागुन १८ गते वडा नं १ स्याउले स्वास्थ्यचौकी, फागुन १९ गते वडा नं ३ बतासे स्वास्थ्यचौकी , फागुन २० गते वडा नं २ बतासे आधारभुत स्वास्थ्य सेवा केन्द्र, फागुन २१ गते वडा नं १० जल्किने स्वास्थ्यचौकीमा शिविर हुनेछ ।