आइसिँ तामाङ,पाँचपोखरी सिन्धुपाल्चोक ।
सिन्धुपाल्चोक जिल्लाको पाँचपोखरी थाङपाल, हेलम्बु, मेलम्ची र इन्द्रावती क्षेत्रका बासिन्दा लामो समयदेखि विद्युत अवरुद्ध भएर समस्यामा परिरहेका छन् सोही सन्दर्भमा नेपाल विद्युत प्राधिकरण समाधानतर्फ गम्भीर नदेखिएको भन्दै नेपाल कम्युनिस्ट पार्टी (माओवादी केन्द्र) पाँचपोखरी थाङपाल गाउँपालिका समितिले हेलम्बु–मेलम्ची वितरण केन्द्रलाई ज्ञापनपत्र बुझाएको छ। पार्टी अध्यक्ष दिलबहादुर वाइबाको नेतृत्वमा बुझाइएको ज्ञापनमा विद्युत सेवा प्रवाहमा देखिएको लापरबाही, ढिलासुस्ती र असमानताप्रति गम्भीर आपत्ति जनाइएको छ। ज्ञापनपत्रमा ट्रान्सफर्मर मर्मत, पोल तथा लाइन व्यवस्थापन, अघोषित लोडसेडिङको अन्त्य, दीर्घकालीन पूर्वाधार योजना र प्राधिकरणको कार्यशैलीबारे जनतालाई स्पष्ट जानकारी दिनुपर्ने माग गरिएको छ। अध्यक्ष वाइबाले कुलमान घिसिङलाई हटाइएपछि विद्युत समस्या बढेको आरोप लगाउँदै जनताको आधारभूत अधिकारमा राज्यले ध्यान नदिएको गुनासो गर्नुभयो। स्थानीय नेता लोकमान तामाङले पार्टी र स्थानीय तहको समन्वयमा समस्या समाधानका लागि थप दबाब दिन आग्रह गर्नुभयो। ज्ञापनपत्रमा पालिका इन्चार्ज अर्जुन लोप्चन, सचिव रमेश शेर्पा, नेता प्रेम पुरी लगायत स्थानीय नेताहरूको उपस्थिति थियो। प्राधिकरण प्रतिनिधिले सबस्टेशन निर्माणको प्रयास भइरहेको तर सीमित स्रोत र अन्य ठाउँबाट लाइन झिकेर सेवा दिनुपर्दा समस्या भएको प्रतिक्रिया दिएका छन्। माओवादी केन्द्रले समस्या समाधान नभए आन्दोलनका कार्यक्रम अघि बढाउने चेतावनी समेत दिएको छ।