जनतापत्र, सिन्धुपाल्चोक ।
पाँचपोखरी थाङ्पाल गाउँपालिकाको हिउँदे गाउँसभाको १८औँ अधिवेशन विभिन्न महत्वपूर्ण विधेयक, नियमावली तथा समसामयिक विषयमाथि छलफल गर्दै सम्पन्न भएको छ । अधिवेशनमा गाउँसभाको सचिवालय स्थापना तथा कार्यसञ्चालन विधेयक–२०८२, भाङ्गोजन्य पदार्थ संरक्षण तथा व्यवस्थापन विधेयक–२०८२, आर्थिक कार्यविधि तथा वित्तीय उत्तरदायित्वसम्बन्धी व्यवस्था गर्न बनेको विधेयक–२०८२ तथा न्यायिक समितिले उजुरीको कारबाही किनारा गर्दा अपनाउनुपर्ने कार्यविधि सम्बन्धी विधेयक–२०८२ माथि विस्तृत छलफल गरिएको थियो ।

त्यसैगरी अधिवेशनले न्यायिक समिति सञ्चालन नियमावली–२०८२, खडकुले झरना संरक्षण तथा प्रवर्द्धन नियमावली–२०८२ र वेत्रावती मन्दिर संरक्षण तथा प्रवर्द्धन नियमावली–२०८२ समेत पारित गरेको छ । अधिवेशनमा बेरुजु फछ्र्यौट, बजेट संशोधन, करार कर्मचारीको म्याद थप, न्यायिक समितिको प्रतिवेदन प्रस्तुत तथा अनुमोदन लगायतका विषयमा पनि छलफल भएको गाउँपालिकाका प्रवक्ता तथा वडा नम्बर–६ का वडाध्यक्ष नारायण भट्टराईले जानकारी दिनुभयो । गाउँपालिका अध्यक्ष टासी लामाको अध्यक्षतामा सम्पन्न अधिवेशनमा उपाध्यक्ष सुनिता अधिकारी, प्रमुख प्रशासकीय अधिकृत लक्ष्मण कुँइकेल, वडा अध्यक्षहरू, कार्यपालिका सदस्यहरू, वडा सदस्यहरू तथा कर्मचारीहरूको उपस्थिति रहेको थियो ।