जनतापत्र, पाँचपोखरी सिन्धुपाल्चोक ।
पाँचपोखरी थाङपाल गाउँपालिका अन्तर्गतका सहकारी संस्थाहरूका प्रतिनिधिहरूका लागि आयोजित सहकारी तथा गरिबी सम्बन्धी व्यवस्थापन सूचना प्रणाली कार्यान्वयन र सम्पत्ति शुद्धिकरणसम्बन्धी अभिमुखीकरण तालिम सम्पन्न भएको छ। गाउँपालिकाको सभाहलमा कार्तिक १० देखि १२ गतेसम्म सञ्चालन गरिएको उक्त तालिममा सहकारीहरूको प्रभावकारी व्यवस्थापन, सुशासन, पारदर्शिता र आर्थिक उत्तरदायित्वबारे विस्तृत रूपमा प्रशिक्षण प्रदान गरिएको थियो। कार्यक्रमको सहजीकरण नेपाल नेफ्स्कुन का वरिष्ठ कार्यक्रम अधिकृत नवीनराज दाहाल र गाउँपालिकाका रोजगार संयोजक तथा सहकारी फोकल पर्सन ध्रुवप्रसाद लामिछानेले गर्नुभएको थियो। तालिमको उद्घाटन गर्दै गाउँपालिकाका अध्यक्ष टासी लामाले सहकारीहरूलाई गाउँपालिकाको नीति तथा कार्यक्रमअनुसार व्यवस्थित रूपमा सञ्चालन गर्न आग्रह गर्नुभयो। उहाँले नमुना सहकारी अभियान सञ्चालनमार्फत स्थानीय आर्थिक समृद्धिको आधार तयार गर्न सकिने बताउनुभयो। त्यस्तै, गाउँपालिकाका प्रमुख प्रशासकीय अधिकृत लक्ष्मण कुइकेलले सहकारी संस्थाहरू कानुनअनुसार सञ्चालन हुनुपर्नेमा जोड दिनुभयो। सहकारी सञ्चालनका क्रममा कुनै समस्या देखिएमा गाउँपालिकाले आवश्यक सहयोग र सहजीकरण गर्ने प्रतिबद्धता व्यक्त गर्नुभयो।