जनतापत्र, सिन्धुपाल्चोक — पाँचपोखरी क्षेत्रमा टेलिकम टावर स्थापना गर्न आवश्यक स्वीकृति अन्ततः प्राप्त भएको छ। निकुञ्जको अनुमतिसँगै अब यस क्षेत्रका तीर्थयात्री, पर्यटक र स्थानीय बासिन्दाले लामो समयदेखि प्रतीक्षा गरेको दूरसञ्चार सेवा पाउने अपेक्षा गरिएको छ।

पाँचपोखरी थाङपाल गाउँपालिकाका अध्यक्ष टासी लामाका अनुसार तीन वर्षदेखि निरन्तर प्रयास जारी राख्दै आएकोमा अन्ततः निकुञ्जबाट टावर स्थापनाको अनुमति प्राप्त भएपछि आफू अत्यन्तै हर्षित भएको बताउनुभयो। उहाँका अनुसार यो अनुमति प्राप्त भएपछि अब छिट्टै टेलिकम टावर निर्माण कार्य सुरु गरिनेछ।

लामाले पाँचपोखरीसम्म विद्युत् लाइन विस्तारका लागि आवश्यक स्वीकृति प्रक्रिया पनि अघि बढिरहेको जानकारी दिनुभयो। उहाँले यस अभियानको प्रारम्भदेखि सहयोग र समझदारीका लागि जिल्ला प्रशासन कार्यालयप्रति विशेष आभार प्रकट गर्नुभयो।

यो पहलले पाँचपोखरी क्षेत्रको धार्मिक पर्यटन, आपतकालीन संचार सेवा र आर्थिक गतिविधि विस्तारमा सकारात्मक प्रभाव पार्ने विश्वास गरिएको छ।