जनतापत्र, सिन्धुपाल्चोक ।
नेपाल शिक्षक महासंघले विद्यालय शिक्षा विधेयकप्रति गम्भीर असन्तुष्टि व्यक्त गर्दै आन्दोलनका कार्यक्रम घोषणा गरेको छ। महासंघले विगतमा सरकारसँग भएका सहमतिअनुसार विधेयक नआएको आरोप लगाएको छ। महासंघका अध्यक्ष लक्ष्मीकिशोर सुवेदीले भदौ ९ गते देखि देशभर एकसाथ आन्दोलन सुरु गर्ने जानकारी दिए।
पहिलो चरणमा महासंघले स्थानीय तह, राजनीतिक दल, शिक्षामन्त्री र प्रधानमन्त्रीलाई आफ्ना मागबारे जानकारी गराउने र ध्यानाकर्षण गराउनेछ। यदि त्यसपछि पनि मागहरू सम्बोधन नभए, भदौ २१ गते देखि निषेधात्मक र निर्णायक आन्दोलनमा उत्रिने तयारी रहेको महासंघले जनाएको छ।
हालै संसद्को शिक्षा, स्वास्थ्य तथा सूचना प्रविधि समितिले विधेयक पारित गरिसकेको छ र अब यो प्रतिनिधिसभामा पेस हुनेछ। यसअघि पनि शिक्षकहरूले गत चैत १५ देखि २९ दिनसम्म आन्दोलन गरेका थिए। यसैबीच, निजी विद्यालय सञ्चालकहरूले पनि बिहीबारदेखि नै आन्दोलन थालेका छन्।
यो घटनाक्रमले शिक्षा क्षेत्रमा उत्पन्न तनावलाई थप बढाएको छ।