जनतापत्र,रसुवा ।
नेपाल र चीनबीचको प्रमुख व्यापारिक नाका रसुवागढीमा वैकल्पिक बेलीबृज निर्माण कार्य आजदेखि नेपालतर्फ पनि सुरु भएको छ। जिल्ला प्रशासन कार्यालय रसुवाले दिएको जानकारीअनुसार चीनले आफ्नो तर्फको निर्माण कार्य पूरा गरेर लेन्देखोलामा डाइभर्सन तयार पारेपछि चिनियाँ प्राविधिक तथा कामदार नेपाल प्रवेश गरी काम अघि बढाएका हुन्। प्रमुख जिल्ला अधिकारी राजेश पन्थीका अनुसार डाइभर्सन निर्माण सम्पन्न भएपछि चीनको केरुङमा काम गर्दै आएका १६३ जना नेपाली मजदुर पनि नेपाल फर्किएका छन्। गत असार २४ र साउन १४ गतेको बाढीले क्षति पुर्‍याएको स्याफ्रुबेसी–रसुवागढी सडकखण्ड हाल एकतर्फी सञ्चालनमा छ। पुल निर्माण कार्य भने सुरक्षा निकायको निगरानीमा अघि बढाइने बताइएको छ। यसैबीच, पासाङल्यामु राजमार्ग अन्तर्गत स्याफु–भार्खु खण्डमा याङयाङ खोलानजिक ढुङ्गा र माटोको कारण आवागमनमा कठिनाइ भएको छ। प्रजिअ पन्थीका अनुसार अवरोध हटाउने काम भइरहेको र आज साँझसम्म बाटो खुल्नेछ। चीनको लेन्देखोलामा असार २४ गते आएको बाढीले नेपाल–चीन सिमानामा रहेको ऐतिहासिक मितेरी पुल बगाएपछि वैकल्पिक रूपमा बेलीबृज निर्माण सुरु गरिएको हो।