जनतापत्र,सिन्धुपाल्चोक ।

नेपाल निजामती कर्मचारी संगठन, सिन्धुपाल्चोकले सहिद मनोज–झपेन्द्र–सुरेन्द्र स्मृति दिवसको अवसरमा एक सामाजिक कार्य सम्पन्न गरेको छ। जिल्ला सदरमुकाम चौतारामा रहेको बौद्धिक अपांगता भएका बालबालिकाको आवास गृहमा संगठनले लत्ताकपडा, खाद्यान्न र फलफूल वितरण गरेको हो। संगठनले आवास गृहका बालबालिकालाई १० सेट टिसर्ट र ट्राउजर, दुई बोरा चामल, दाल, तेल तथा फलफूल प्रदान गरेको छ। कार्यक्रमका प्रमुख अतिथि नेपाल निजामती कर्मचारी संगठनका केन्द्रीय सचिवालय सदस्य मेघराज भट्टराईले निजामती कर्मचारीको हकहितका लागि संगठनले निरन्तर काम गर्दै आएको र यस्ता रचनात्मक कार्यक्रमले नागरिकको विश्वास जित्न सहयोग पुग्ने बताए।

उनले बौद्धिक अपांगता भएका बालबालिकालाई बेलाबेलामा सहयोग गर्दा सम्बन्धित निकायको ध्यान आकर्षित हुने धारणा पनि व्यक्त गरे। साथै, उनले कर्मचारीहरूलाई निष्पक्ष भएर सार्वजनिक सेवा प्रवाह गर्न पनि आग्रह गरे। कार्यक्रमका विशेष अतिथि नेकपा एमाले सिन्धुपाल्चोकका सल्लाहकार एवं पूर्वमाननीय कृष्णराज श्रेष्ठले संगठनका यस्ता क्रियाकलापले यसको छवि अझ बलियो हुने भन्दै प्रशंसा गरे। उनले संगठनको राम्रो र सिर्जनात्मक कार्यमा नेकपा एमाले सधैं सहयोग गर्न तयार रहेको प्रतिबद्धता जनाए। आवास गृह सञ्चालक एवं अभिभावक संघकी सचिव रजनी श्रेष्ठले सहयोगका लागि संगठनप्रति आभार व्यक्त गरिन्। कार्यक्रमको अध्यक्षता नेपाल निजामती कर्मचारी संगठन, सिन्धुपाल्चोकका अध्यक्ष दुर्गाप्रसाद ढुङ्गेलले गरेका थिए। उनले संगठनले ठूला काम गर्न नसके पनि छायाँमा परेका समस्याहरूलाई उजागर गर्दै सरोकारवालाहरूलाई सचेत गराउने कार्यलाई निरन्तरता दिने प्रतिबद्धता व्यक्त गरे।