जनतापत्र, सिन्धुपाल्चोक

सिन्धुपाल्चोक जिल्लाको चौतारा साँगाचोकगढी नगरपालिकामा मङ्गलबार नेकपा (एमाले) द्वारा आयोजित भव्य जनप्रदर्शन सफलतापूर्वक सम्पन्न भएको छ। पार्टी केन्द्रीय सचिवालयको निर्देशन अनुसार देशभर आयोजना भइरहेका जनप्रदर्शन कार्यक्रमअन्तर्गत चौतारामा पनि ऐतिहासिक र उत्साहजनक सहभागितासहितको प्रदर्शन गरिएको हो। कार्यक्रममा प्रमुख अतिथिका रूपमा नेकपा (एमाले) का वरिष्ठ नेता तथा पूर्व सांसद सुवास कर्मचार्य उपस्थिति रहेको थियो। विशेष अतिथिका रूपमा पूर्व सांसद तथा पार्टी सल्लाहकार कृशाराज श्रेष्ठ, र अतिथि रूपमा चौतारा साँगाचोकगढी नगरप्रमुख अमानसिङ तामाङ लगायतका नेताहरू सहभागी थिए।

जनसभामा हजारौं कार्यकर्ता तथा स्थानीय जनसमुदायले “देश विकासका लागि एमाले, जनताको सरकारका लागि एमाले” भन्ने नारा घन्काएका थिए। वक्ताहरूले हालको राष्ट्रिय राजनीतिक परिस्थिति, विकासका चुनौती र जनहितका एजेन्डामा एमालेको दृष्टिकोण स्पष्ट रूपमा प्रस्तुत गरे।

उनीहरूले सरकारको असफलता, भ्रष्टाचार र जनअपेक्षासँग मेल नखाने नीतिहरूप्रति आलोचना गर्दै जनमत एकताबद्ध हुनुपर्नेमा जोड दिए।