जनतापत्र, मेलम्ची ।
जिल्लाको मेलम्ची नगरपालिकामा गत मंगलबार निशुल्क स्त्रीरोग तथा प्रजनन् स्वास्थ्य शिविर सम्पन्न भएको छ । उक्त शिविरबाट ७२ जनाले सेवा लिएका छन् ।
फेक्ट नेपालको आयोजना , मेलम्ची नगरपालिकाको संयोजन भएको उक्त शिविरमा आफ्नो मन्तव्य राख्दै
मेलम्ची नगरपालिकाका उपप्रमुख उमा प्रधानले कुन रोग लाग्दा कुन अस्पताल जाने भन्ने थाहा नहुदा धेरै समस्या हुने गरेको जानकारी दिनुभयो । उहाँले आफुमा लागेको रोगको पहिचान गर्न नसक्दा र पहिचान भएको रोगको समेत सहज उपचार नपाउँदा धेरै अफ्ट्यारो हुने बताउँदै उपप्रमुख प्रधानले आफुमा लागेको रोगको उपचारका लागी समेत प्रोत्साहन गर्नुपर्ने आवश्यकता रहेको जानकारी दिनुभयो ।
उहाँले विगतमा नगरपालिकाले महिला,बालबालिका,जेष्ठ नागरिक लगायत विभिन्न रोगको शिविर संचालन गरेको स्तन र पाठेघर क्यान्सरका धेरै समस्याहरु देखा पर्न थालेको बताउनुभयो ।
कम उमेरमा बिहे गर्दा हुने समस्या,कम उमेरमा बच्चा जन्माउदा निम्तिने समस्या लगायतका बारेमा सचेतना फैलाउन आवश्यक रहेको उहाँको भनाई थियो । प्रधानले आफुमा भएका समस्या खुलेर राख्न र उचित स्वास्थ्य सेवा लिन समेत अनुरोध गर्नुभयो ।
नगर अस्पतालमै स्तन क्यान्सर र पाठेघर क्यानसरको नियमित जाँच हुने गरेको कार्यक्रममा मेलम्ची नगर अस्पतालका प्रमुख डाक्टर किरण श्रेष्ठले बताउनुभयो ।
शिविरको लागी आयोजकलाई धन्यवाद दिदैं डाक्टर श्रेष्ठले महिनाको कम्तीमा एक पटक विशेषज्ञ डाक्टर बाट सेवा दिन सकियो भने अझै सहज हुने बताउँदै शिविरमा ७२ जनाले सेवा लिएको कार्यक्रम संयोजक गौरी मालाकाले जनाउनुभयो ।