जनतापत्र, सिन्धुपाल्चोक ।
अमेरिकाको दक्षिणी मेरिल्यान्डमा बसोबास गर्ने नेपाली समुदायले शनिबार भव्य सांस्कृतिक कार्यक्रम सम्पन्न गरेको छ। नेपाली संस्कृति, कला र परम्पराको संरक्षण तथा प्रवर्द्धन गर्ने उद्देश्यले आयोजना गरिएको कार्यक्रममा १५० भन्दा बढी नेपालीहरूको उत्साहपूर्ण उपस्थिति रहेको थियो। कार्यक्रमको उद्घाटन ८४ वर्षका ज्येष्ठ नागरिक हरिनाथ बास्तोलाले परम्परागत विधिबाट दियो बालेर गर्नुभयो। त्यसपछि नृत्य, गीत, देउसी–भैलोलगायत करिब १० विविध सांस्कृतिक प्रस्तुतिहरूले मञ्च झन् जीवन्त बनेको थियो। प्रस्तुतिहरूमा बालबालिका, युवा र समुदायका सदस्यहरूले नेपालीपन झल्काउने आकर्षक प्रदर्शन गरेका थिए।
कार्यक्रमको संयोजन मधु नेपालले गर्नुभएको थियो भने सह–समन्वयमा शन्तोष नेपाल र प्रविण श्रेष्ठ रहनुभएको थियो। मधु नेपालले अमेरिकामा रहेका नेपालीहरूबीच सांस्कृतिक एकता र पहिचान प्रवर्द्धनमा निरन्तर योगदान दिँदै आउनुभएको छ। कार्यक्रमको सञ्चालन कृष्ण श्रेष्ठले प्रभावकारी ढङ्गले गर्नुभयो। समाजसेवी तथा सक्रिय युवा दिनेश खतीवडाका अनुसार, यस्ता कार्यक्रमहरूले अमेरिकामा रहेका नेपालीबीच आपसी सम्बन्ध, एकता र सांस्कृतिक पहिचानलाई अझ सुदृढ बनाउने विश्वास गरिएको छ।