जनतापत्र,पाँचपोखरी सिन्धुपाल्चोक ।
पाँचपोखरी थाङ्पाल गाउँपालिका वडा नम्बर ६ स्थित श्री थाङ्पालधाप माध्यमिक विद्यालयको अङ्ग्रेजी विभागद्वारा पहिलो पटक आयोजना गरिएको अङ्ग्रेजी निबन्ध लेखन प्रतियोगिता सम्पन्न भएको छ। प्रतियोगितामा गाउँपालिकाभित्रका सबै माध्यमिक विद्यालयका विद्यार्थीहरूले सहभागिता जनाएका थिए। प्रतियोगितामा आर।बी। पौडेल थाङ्पालधाप माध्यमिक विद्यालय प्रथम, कृष्ण तामाङ श्री भिमविद्याश्रम माध्यमिक विद्यालय दोस्रो, दावा साङ्बो बोम्जन चण्डिका माध्यमिक विद्यालय तेस्रो र मिङमार स्याङ्बो तामाङ श्री याङ्री एकेडेमीक सेन्टर सान्त्वना पुरस्कार विजेताका रूपमा चयन भए। निर्णायकका रूपमा श्री सरस्वती माध्यमिक विद्यालयका प्रधानाध्यापक कुमार घोरासैनी रहेका थिए। कार्यक्रम विद्यालय व्यवस्थापन समितिका अध्यक्ष सुदे वाइबाको अध्यक्षतामा, वडा कार्यालयको सहयोगमा सम्पन्न भयो। गाउँपालिका अध्यक्ष टासी लामाले विद्यालयको प्रयास प्रशंसनीय रहेको भन्दै आवश्यक सहयोग जारी राख्ने प्रतिबद्धता व्यक्त गरे। विशेष अतिथि तथा वडा अध्यक्ष नारायण भट्टराईले सहभागी सबै विद्यार्थीलाई बधाई दिए र शैक्षिक गतिविधिमा निरन्तर सहयोग गर्ने आश्वासन दिए। अंग्रेजी विभागले छोटो समयमै विद्यालयलाई अंग्रेजीमैत्री वातावरण प्रदान गर्दै विविध कार्यक्रम सञ्चालन गरेको छ। विभाग अध्यक्ष नवीन श्रेष्ठका अनुसार, प्रतियोगिताले विद्यार्थीको लेखन क्षमता र प्रतिस्पर्धात्मक भावना विकास गर्न सहयोग पुर्‍याएको छ। विद्यालयले भविष्यमा पनि यस्ता सिर्जनात्मक कार्यक्रमहरू निरन्तर सञ्चालन गर्ने योजना बनाएको छ।