जनतापत्र,पाँचपोखरी सिन्धुपाल्चोक ।
पाँचपोखरी थाङ्पाल गाउँपालिका–६ टारस्थित थाङपालधाप साना किसान कृषि सहकारी संस्थाको सातौँ साधारणसभा गाउँपालिका अध्यक्ष टासी लामाको प्रमुख आतिथ्यमा सम्पन्न भएको छ। अध्यक्ष लामाले सहकारी किसानको बैंक भएकाले पारदर्शिता र विधिअनुसार सञ्चालन गर्नुपर्नेमा जोड दिए। गाउँपालिका उपाध्यक्ष सुनिता अधिकारीले सहकारीले महिलालाई आत्मनिर्भर बनाउन ठूलो भूमिका खेलेको बताउँदै सेवाप्रवाह अझै व्यवसायमुखी हुनुपर्ने धारणा राखिन्।
जिल्ला सहकारी संघका अध्यक्ष मित्रलाल चौलागाईंले सहकारीमार्फत समतामूलक समाज निर्माणमा सहयोग पुग्ने उल्लेख गर्दै सदस्यलाई योजनाबद्ध रूपमा ऋण लगानी गर्न आग्रह गरे। कार्यक्रममा असल ऋणी, असल बचतकर्ता र बाल बचतकर्तालाई सम्मान गरिएको थियो। आर्थिक तथा आगामी कार्यक्रमको प्रतिवेदन क्रमशः प्रबन्धक प्रतिज्ञा पौडेल र अध्यक्ष बाबुराम पौडेलले प्रस्तुत गरेका थिए। सहकारीमा ७२८ शेयर सदस्य रहेको छ भने ६ करोड ९७ लाख ७३ हजार बराबरको कारोबार भएको जानकारी दिइएको छ।