जनतापत्र,मेलम्ची,सिन्धुपाल्चोक ।
तिपेनी हुँदै भोताङसम्म पुग्ने मेलम्ची–खाल्डेखोला सडक खण्डको स्तरोन्नति तथा कालोपत्रे कार्यको शिलान्यास बागमती प्रदेशका खानेपानी, ऊर्जा तथा सिँचाइ मन्त्री कृष्णकुमार तामाङले गर्नुभएको छ। बागमती प्रदेश सरकारको भौतिक पूर्वाधार विकास मन्त्रालय अन्तर्गतको पूर्वाधार विकास कार्यालय, सिन्धुपाल्चोकको आयोजनामा गरिएको शिलान्यास कार्यक्रममा मन्त्री तामाङले वर्षौँदेखि चुनावी भाषणको विषय बनेको यो सडक अब व्यवहारिक रूपमा निर्माणको चरणमा पुगेको बताउनुभयो। उहाँले “अब जनता कुरामा होइन, काममा विश्वास गर्नेछन्,” भन्दै सडकलाई प्राथमिकतामा राखेर अघि बढाइने प्रतिबद्धता जनाउनुभयो। मन्त्री तामाङले प्रदेश सरकारले सडक सञ्जाल विस्तारलाई मुख्य प्राथमिकता दिएको उल्लेख गर्दै मेलम्ची–भोताङ सडकले मेलम्ची क्षेत्रको आर्थिक तथा सामाजिक विकासमा महत्वपूर्ण भूमिका खेल्ने विश्वास व्यक्त गर्नुभयो। उहाँले सडक, सिँचाइ र पुलजस्ता आधारभूत पूर्वाधारमा निरन्तर काम भइरहेको पनि जानकारी दिनुभयो। कार्यक्रमका विशेष अतिथि मेलम्ची नगरपालिकाका प्रमुख आइतमान तामाङले लामो समयदेखि निर्माण हुन नसकेको यो सडक सबैको संयुक्त प्रयासपछि अघि बढ्न लागेको बताउनुभयो। उहाँले परियोजनाको श्रेय कसैले व्यक्तिगत वा राजनीतिक रूपमा लिनु नपर्ने भन्दै सबैको साझा प्रयासको परिणाम भएको धारणा राख्नुभयो। त्यस्तै, पाँचपोखरी थाङपाल गाउँपालिकाका अध्यक्ष टासी लामाले आफ्नो गाउँपालिकाको “लाइफलाइन” मानिने यो सडक कालोपत्रे हुने चरणमा पुगेकोमा खुशी व्यक्त गर्नुभयो। उहाँका अनुसार पूर्व भौतिक पूर्वाधार मन्त्री युवराज दुलाल, सांसद अमन मास्के र हालका मन्त्री कृष्णकुमार तामाङको निरन्तर पहल र संघर्षपछि यो गौरवमय योजनाको कार्यान्वयन सुरु भएको हो। आर्थिक वर्ष २०८२र८३ अन्तर्गत बागमती प्रदेश सरकारको पूर्वाधार विकास कार्यालय चौतारा, सिन्धुपाल्चोकमार्फत् करिब रु। ९ करोड लागतमा ईफाता रगेहेन्द्र जे।भी सँग ठेक्का सम्झौता गरिएको छ। परियोजनाले करिब ३२ किलोमिटर सडक स्तरोन्नति तथा कालोपत्रे गर्ने लक्ष्य राखेको छ, जसबाट स्थानीय बासिन्दालाई सहज आवागमन र बजार पहुँच विस्तार हुने अपेक्षा गरिएको छ। शिलान्यास समारोह पूर्वाधार विकास कार्यालय, सिन्धुपाल्चोकका प्रमुख इन्जिनियर प्रकाश पौडेलको अध्यक्षतामा सम्पन्न भएको हो। कार्यक्रममा मेलम्ची नगरपालिकाका वडा अध्यक्षहरू, पाँचपोखरी थाङपाल गाउँपालिकाका जनप्रतिनिधि र स्थानीय बासिन्दाको उल्लेख्य सहभागिता रहेको थियो।