आइसिँ तामाङ, तातोपानी सिन्धुपाल्चोक ।तातोपानी नाकाबाट करिब २ किमी तल कोदारीमा गएको पहिरोले नेपाल–चीनको मुख्य व्यापारिक मार्ग अवरुद्ध भएको छ। रसुवा नाका बन्द भएपछि सम्पूर्ण व्यापारिक चाप तातोपानीमा केन्द्रित भएको बेला फेरि यो नाका पनि ठप्प भएपछि सीमा व्यापार संकटमा परेको छ।
चीनको नेलाम क्षेत्रमा स्याउ, लसुन, अंगुर, आँपजस्ता छिटो बिग्रने सामग्री बोकेका ६५ वटा कन्टेनर थन्किएका छन्। नेपालतर्फ पनि १७ वटा कन्टेनर भन्सार नाघ्न नपाई बाटैमा रोकिएका छन्। कन्टेनरभित्र फलफूल कुहिन थालेको र करोडौं मूल्यको सामग्री खेर जाने जोखिम बढेको व्यवसायीहरूको गुनासो छ। रसुवा बन्द भएको कारण मानसरोवर तीर्थयात्री पनि तातोपानीबाटै आउजाउ गर्न थालेका छन्। एकै दिनमा हजारभन्दा बढी तीर्थयात्रीले बाटो पार गर्दा नाका क्षेत्रमा चाप थपिएको छ। तर सडक हिँड्नै नमिल्ने अवस्थामा पुग्दा तीर्थयात्रीहरू समेत जोखिममा परेका छन्। भोटेकोशीको कट्टान र माथिबाट बग्ने माटोको लेदोले सडक खोल्ने प्रयास बारम्बार असफल हुँदै आएको छ। पहिरो पन्छाउने क्रममा डोजरको कटिङले नजिकैको बस्ती जोखिममा पर्दा स्थानीयवासीले काम रोक्न माग गर्दै विरोध जनाएका छन्।
तातोपानी भन्सार प्रमुख सूर्य काफ्लेले जेठयता सडक अबरुद्ध भइरहँदा कारोबार ठप्प भएको र यस महिनाको राजस्व संकलन ३६ प्रतिशतमा झरेको जानकारी दिनु भएको छ । तातोपानी भन्सारको चालु आर्थिक वर्षको राजस्व लक्ष्य झण्डै २५ अर्ब रुपैयाँ भए पनि लक्ष्य पुरा हुने सम्भावना कमजोर भएको छ।
२३ श्रावण २०८२, बिहीबार ११:१८
