जनतापत्र,भोटेकोशी ।
भोटेकोसी गाउँपालिकाको कोदारी क्षेत्रस्थित तातोपानी नाका जोड्ने मुख्य सडकमा गएको पहिरोले दुई सातादेखि सडक सम्पर्क अवरुद्ध बनाएपछि हाल नयाँ ट्रयाक खोल्ने कार्य अन्तिम चरणमा पुगेको छ। सडक डिभिजन कार्यालय चरिकोटका सूचना अधिकारी इन्जिनियर सुरज महर्जनका अनुसार, बिहीबार बेलुकासम्म पहिरो नियन्त्रणमा लिँदै वैकल्पिक बाटोमार्फत सडक पुनः सञ्चालनमा ल्याउने तयारी भइरहेको छ।
गत केही दिनयता संघीय सांसद माधव सापकोटासहित स्थानीय नेताहरू र व्यापारिक संघसंस्थाहरूको पहलमा भौतिक पूर्वाधार तथा यातायातमन्त्री देवेन्द्र दाहाललाई स्थलगत अवस्था जानकारी गराएपछि उच्चस्तरीय टोली परिचालित गरिएको हो।
मन्त्रीको निर्देशनमा खटिएको इन्जिनियर शुभराज न्यौपाने नेतृत्वको प्राविधिक टोलीले पहिरो स्थलको निरीक्षणपछि ड्रिलिङ मेसिनमार्फत पहिरोभित्र थुनिएको पानी बाहिर निकाल्ने काम सुरु गरेको छ। पानीको दबाब हटेसँगै हिलोको बहाव थामिने र स्थायीतर्फ उन्मुख हुने अपेक्षा गरिएको छ।
सडक अवरुद्ध भएको १२ दिनपछि मात्रै डिभिजनले दीर्घकालीन समाधानतर्फ योजना अघि बढाएको हो। नदी किनाराबाट तारजाली राख्ने, पहिरो माथिको वर्षा रोक्ने उपायहरू, र वैकल्पिक ट्रयाक निर्माणलगायतका कामहरू तीव्र गतिमा भइरहेका छन्।
यस कार्यमा तातोपानी भन्सार क्षेत्रमा काम गर्ने मजदुरहरूले स्वेच्छिक श्रमदान गरिरहेका छन्। उनीहरूका लागि खाजाको व्यवस्था हिमालय सीमापार वाणिज्य संघका सदस्य तथा स्याउ व्यवसायी शारदाप्रसाद पराजुलीले मिलाएका छन्। वर्षाको पानी सिधै पहिरोमा झरेर थप क्षति नहोस् भन्नका लागि आडो ट्रान्सपोर्ट कम्पनीले ठूलो प्लास्टिक शीट ९छ वटा रोल० उपलब्ध गराएको छ, जसले पानी पहिरोबाट मोड्ने काम गर्नेछ।
सडक बन्द हुँदा चाडपर्वलाई लक्षित सामग्रीसहितका कन्टेनरहरू सीमाक्षेत्रमै रोकिएका छन्। फलफूलजस्ता नाशिने वस्तुहरू भने भरियामार्फत काँधमा बोकिँदै भन्सारसम्म ल्याइँदैछन्। हालसम्म करिब १०० कन्टेनर बराबर फलफूल यस्तै गरी ल्याइएको भन्सार स्रोतले जनाएको छ।