जनतापत्र, सिन्धुपाल्चोक ।
सिन्धुपाल्चोकको चौतारा साँगाचोकगढी नगरपालिका–१४ डडुवामा गोलभेडा लगायत स्थानीय कृषि सामग्रीबाट अचार उत्पादन गर्ने तालिम सुरु भएको छ। बागमती प्रदेश सरकारको सशर्त अनुदान तथा चौतारा साँगाचोकगढी नगरपालिकाको आर्थिक सहयोगमा नेत्रज्योती कृषि सहकारी संस्थाले माझी र विपन्न परिवारलाई लक्षित गरी उक्त तालिम संचालन गरेको हो। नगरपालिकाका प्रमुख प्रशासकीय अधिकृत बैकुण्ठ प्रसाद सापकोटाको प्रमुख आतिथ्यमा र वडाध्यक्ष उद्धव नेपालको विशेष आतिथ्यमा तालिमको उद्घाटन भयो। स्थानीय रूपमा उत्पादन हुने गोलभेडा, लप्सी, अमला, काउली, स्कुस लगायतका सामग्री प्रयोग गरी व्यवसायिक अचार उत्पादन गरेर बजारमा पुर्‍याउने उद्देश्यले तालिम सुरु गरिएको सहकारीका व्यवस्थापक नेत्रबहादुर बस्नेतले बताए। उद्घाटन कार्यक्रममा प्रमुख प्रशासकीय अधिकृत सापकोटाले स्थानीय उद्यमीलाई प्रोत्साहन तथा बजार विस्तारमा नगरपालिका निरन्तर सहकार्य गर्न तयार रहेको बताए। वडाध्यक्ष नेपालले गाउँमा उत्पादन हुने सामग्री गाउँमै प्रशोधन गरी उद्योग विकासतर्फ अघि बढाउने योजनामा तालिम महत्त्वपूर्ण हुने उल्लेख गरे। जनहित दुग्ध उत्पादक सहकारीका अध्यक्ष तथा डडुवा भवानीशंकर माध्यमिक विद्यालयका प्रअ बद्री प्रसाद नेपालले सहकारीको पहलले स्थानीय उत्पादनको मूल्यवर्धनमा टेवा पुग्ने धारणा राखे। सहभागी अन्जु माझीले माझी समुदायका लागि यस्तो कार्यक्रम पहिलोपटक आएको भन्दै तालिमले महिलाको आय–आर्जनमा प्रत्यक्ष लाभ पुग्ने विश्वास व्यक्त गरिन्। कार्यक्रम नेत्रज्योती कृषि सहकारीका अध्यक्ष कृष्णबहादुर नेपालको सभापतित्वमा सम्पन्न भएको थियो। उद्घाटनपछि प्रमुख प्रशासकीय अधिकृत सापकोटाले अचार उत्पादन प्रक्रियाको प्रारम्भिक कार्यमा सहभागिता जनाउँदै तालिम औपचारिक रूपले सञ्चालनमा ल्याए। नगरपालिका उद्यमी विकास शाखाका सहजकर्ता अर्जुन गतराजले अचार बनाउने तरिका, सावधानी र बजार सम्भावनाबारे प्रविधिमूलक प्रशिक्षण दिए। सहकारीकी कोषाध्यक्ष सीता बानीयनले आगामी वर्षदेखि गाउँमा उत्पादन हुने गोलभेडा गाउँमै खपत हुने खालको कार्यक्रमलाई अझ विस्तार गर्ने योजना रहेको जानकारी दिइन्।