जनतापत्र, सिन्धुपाल्चोक — सरकारले सिन्धु क्षेत्रका मनमोहक हिमश्रृंखलाको आरोहण अनुमति खुलाएपछि जुगल र आसपासका हिमाली ठाउँहरूमा आरोही तथा पर्यटकको चहलपहल उल्लेख्य रूपमा बढेको छ। स्वच्छ मौसम र छिमेकी पहाडहरूको दृश्यावलोकन तथा आरोहण लक्ष्यसहित आन्तरिक र बाह्य पर्यटकहरू हिम क्षेत्रमा आकर्षित भइरहेका छन्।

गत शनिबार बिहान ११ बजे स्कटल्याण्डका चर्चित पर्वतारोही तथा लेखक लिओ हाउल्डीको नेतृत्वमा दुई सदस्यीय टोलीले जुगल गाउँपालिका–शिरस्थित जुगल हिमश्रृंखलाको ११ चुचुरामध्ये ग्याल्जेन पिक सफलतापूर्वक आरोहण गरेको स्थानीय पर्यटन व्यवसायीहरूले जानकारी दिएका छन्। यसअघि, आइतबार बिहान यूकेका जेम्स पिटर विलियम्स पेरियरसहित पाँच सदस्यीय टोलीले ५,९२२ मिटर अग्लो जुगल–५ पिक सफलतापूर्वक चढेको थियो। सिन्धु सुकुटे पर्यटन व्यवसायी संघका अध्यक्ष महेन्द्रसिं थापाका अनुसार लिओको टोलीले ६,१५१ मिटर उचाइको ग्ल्याजेन पिक (फुर्पा ज्यो ज्यो पिक) आरोहण गरेका हुन्। उता, कात्तिक ७ देखि २० सम्म १३ दिने आधार शिविर भ्रमण सकेर फर्किएका टिम लिडर सोनाम लामाले मनमोहक हिमाली सौन्दर्यका कारण पर्यटक तानिने क्रम तीव्र बनेको बताए। “पाँचपोखरी, हेलम्बु र जुगल क्षेत्रमा आउने हरूलाई यहाँका हिमालहरूले लोभ्याइरहेका छन्,” उनले भने।

जुगल हिमश्रृंखलामा ११ प्रमुख पिक छन्। जुगल–४ र जुगल–५ चढ्ने उद्देश्यसहित सात अन्तर्राष्ट्रिय आरोही हालै सो क्षेत्रमै पुगेका थिए। जुगल गाउँपालिका पर्यटन समितिका अध्यक्ष मिलन तामाङका अनुसार गाउँपालिकाले आरोहण टोलीलाई आवश्यक सहयोग पुर्‍याइरहेको छ। स्थानीय बासीहरूको भनाइमा हाल भइरहेको सफल आरोहणहरूले जुगल क्षेत्रलाई साहसिक पर्यटनको उत्कृष्ट गन्तव्यका रूपमा स्थापित गर्न मद्दत गरिरहेको छ। सिन्धुपाल्चोकमा २६ भन्दा बढी हिमश्रृंखलाहरू र धेरै हिमाली पिक रहेका छन्, जसमा हालसम्म दुई दर्जनभन्दा बढी आरोहीहरूले सफल आरोहण गरिसकेका छन्। स्थानीय तहको पहलपछि ६,००० मिटरभन्दा कम उचाइका पिकहरूको खोजी, नयाँ मार्ग पहिचान र ट्रेकिङ रुट विस्तार कार्य पनि तीव्र गतिमा भइरहेको छ।

नेपाल पर्वतारोहण संघ (एनएमए) का अनुसार वाग्मती प्रदेशमा ६१ हिमाल र २५ पिकमध्ये ७ पिकमा औपचारिक आरोहण भइसकेको छ। जिल्लामा केही नयाँ हिमालका नयाँ रुट खोलेर पनि आरोहण गरिएको छ। करिब दुई वर्षअघि हिमालयन सेपहर्ड नेपालको आरोहण युनिट र गायिका सज्जा चौलागाईं, निमाग्याल्जेन शेर्पा, जाइसी स्यालिन्साजस्ता पाँच सदस्यीय टोलीले ५,९२२ मिटर उचाइको जुगल–५ सफलतापूर्वक चढेका थिए। यस्तै, २०७७ मंसिरमा सगरमाथा आरोही माया गुरुङको नेतृत्वमा ६ सदस्यीय टोलीले पाँच हजार ३ सय मिटर उचाइको तिलमान पास पाँचपोखरी पिक र पाँच हजार ५ सय ५६ मिटरको युवा पिक सफलतापूर्वक आरोहण गरेका थिए। उही वर्ष हेलम्बु क्षेत्रको ५,६०५ मिटर अग्लो नयाँ बेमेथाङ पिकमा नेरिका एड्भेन्चर्सका सतिस मान पतिको नेतृत्वमा तीन सदस्यीय टोलीले साहसिक आरोहण सम्पन्न गरेको थियो। नेपालमा ६१ वर्षको आरोहण इतिहास भए पनि काठमाडौँबाट करिब १४० किलोमिटर दूरीमा पर्ने सिन्धुपाल्चोकका धेरै हिमश्रृंखलाहरू पछिल्ला वर्षमा मात्र खुला ढंगले चढिन थालेका हुन्। विश्वभरका साहसिक पर्यटकहरू अहिले जुगल क्षेत्रका नयाँ पिक र हिमशृङ्खलाका रोचक रुटअनुसार आकर्षित भइरहेका छन्, जसले जिल्लाको पर्वत पर्यटनमा नयाँ उचाइ थपेको छ।