जनतापत्र सिन्धुपाल्चोक — स्कटल्याण्डका चर्चित पर्वतारोही तथा लेखक लिओ हाउल्डिङको नेतृत्वमा आएका दुई अन्तर्राष्ट्रिय पर्वतारोहीले जुगल गाउँपालिका–४ स्थित जुगल हिमशृंखलाको ११ चुचुरामध्ये एक ग्याल्जेन पिक (फुर्पा ज्यो ज्यो पिक) सफलतापूर्वक आरोहण गरेका छन्। सिन्धु सुकुटे पर्यटन व्यवसायी संघका अध्यक्ष महेन्द्रसिंह थापाका अनुसार शनिबार बिहान करिब ११ बजे लिओ हाउल्डिङ र नर्वेका हेनरिक बर्गसेन समेटिएको टोलीले ६,१५१ मिटर उचाइको ग्याल्जेन पिक आरोहण गरेको जानकारी स्याटेलाइटमार्फत् प्राप्त भएको हो। उनका अनुसार जुगल–४ आरोहणका लागि गरिएको बारम्बार प्रयास सफल नभएपछि टोलीले वैकल्पिक रूपमा ग्याल्जेन पिकतर्फ मोडिएको थियो। जुगल हिमशृंखलामा कुल ११ प्रमुख चुचुरा रहेका छन्। तीमध्ये ५,९३६ मिटरको जुगल–४ र ५,९२२ मिटरको जुगल–५ आरोहण गर्ने लक्ष्यसहित सात जना अन्तर्राष्ट्रिय पर्वतारोही हाल क्षेत्रमै छन्। थापाको समन्वयमा आएको टोलीले दुवै चुचुरा सम्हाल्ने योजना बनाएको थियो। यसअघि आइतबार बिहान यूकेका जेम्स पिटर विलियम्स पेरियरसहित पाँच सदस्यीय टोलीले जुगल–५ (५,९२२ मिटर) सफलतापूर्वक आरोहण गरेका थिए। जुगल गाउँपालिका पर्यटन समितिका अध्यक्ष मिलन तामाङका अनुसार गाउँपालिकाले पर्वतारोही टोलीलाई आवश्यक सहयोग निरन्तर प्रदान गर्दै आएको छ। तामाङ स्वयं पनि आरोहण टोलीसँगै सहभागी भएका थिए। लगातार सफलताबाट जुगल क्षेत्र साहसिक तथा पर्वतारोहण पर्यटनका लागि आकर्षक गन्तव्यका रूपमा स्थापित हुँदै गएको स्थानीय समुदायको विश्वास छ।