जनतापत्र, सिन्धुपाल्चोक । जुगल गाउँपालिकामा आयोजना गरिएको राष्ट्रपती रनिङ शिल्ड प्रतियोगिता बिहीबारदेखि सुरु भएको छ। “स्वास्थ्यका लागि खेलकुद, राष्ट्रका लागि खेलकुद” भन्ने मूल नारासहित वडा नं. १ मा अवस्थित सेलाङ माध्यमिक विद्यालयको प्राङ्गणमा प्रतियोगिता उत्साहपूर्ण वातावरणमा प्रारम्भ भएको हो। यस वर्ष १० विद्यालयले ४२ विधाका खेलमा प्रतिस्पर्धा गर्दै विद्यालय–स्तरको खेलकुद गतिविधिलाई थप सबल बनाएका छन्। उद्घाटन समारोहका प्रमुख अतिथि तथा गाउँपालिका प्रमुख रेशम स्याङबोले खेलकुद विद्यार्थीको सर्वाङ्गीण विकासको महत्वपूर्ण आधार भएको बताए। उनका अनुसार खेलकुदले प्रतिस्पर्धा मात्र होइन, आत्मविश्वास, अनुशासन र क्षमता अभिवृद्धिमा पनि विशेष योगदान गर्दछ। उनले उत्कृष्ट खेलाडीहरूको अभिलेख गाउँपालिकाले सुरक्षित राख्ने र खेलकुदमा रुचि राख्ने विद्यार्थीलाई आगामी दिनमा आवश्यक सहयोग प्राथमिकताका साथ प्रदान गरिने जानकारी दिए।

प्रतियोगिताको मुख्य जिम्मेवारी जुगल गाउँपालिकाले लिएको छ भने समग्र व्यवस्थापन सेलाङ माध्यमिक विद्यालयले सम्हालेको छ। उद्घाटन कार्यक्रममा गाउँपालिका उपप्रमुख हिमाल श्रेष्ठ, वडा अध्यक्षहरू, विद्यालय प्रमुख, शिक्षक, अभिभावक तथा स्थानीय सरोकारवालाको उल्लेखनीय उपस्थिति रहेको थियो। विद्यालयका प्रधानाध्यापक फिरोज सिलवालका अनुसार विद्यार्थीको सहभागिता र जोश हेर्दा प्रतियोगिता अझ प्रभावकारी हुने अपेक्षा गरिएको छ। दुई दिनसम्म चल्ने यो प्रतिस्पर्धाले स्थानीय विद्यालयहरूबीच स्वस्थ प्रतिस्पर्धा बढाउने र खेलकुदप्रति रुचि अझ मजबुत बनाउने विश्वास व्यक्त गरिएको छ।