जनतापत्र, सिन्धुपाल्चोक
स्थानीय प्रशासनले सिन्धुपाल्चोक जिल्लामा लागू गरिएको निषेधाज्ञा पूर्ण रूपमा हटाउने निर्णय गरेको छ। जिल्ला प्रशासन कार्यालय, सिन्धुपाल्चोकले शुक्रबार २०८२ साउन २८ गते बिहान ९ बजेबाट निषेधाज्ञा हटाइएको जानकारी गराएको हो। जिल्ला प्रशासनको विज्ञप्ती अनुसार, विभिन्न स्थानमा पहिलो चरणको विकास विषयक परिक्षणका कारण स्थानीय प्रशासन ऐन, २०२८ को दफा ६ को उपदफा ३ क बमोजिम २०८२ साउन २६ गतेदेखि लागू गरिएको निषेधाज्ञा अब आवश्यक नपरेको ठहर गरिएको छ। निषेधाज्ञा हटाइएसँगै जिल्ला भित्र सभा, जुलुस, प्रदर्शन, बैठक तथा धरना जस्ता गतिविधि सञ्चालन गर्न अनुमति दिइएको छ। प्रशासनले परिस्थिती सामान्य भइसकेको भन्दै स्थानीयवासी तथा सरोकारवालालाई अबदेखि सामान्य गतिविधि निर्वाध रूपमा गर्न सकिने जानकारी दिएको छ। जिल्ला प्रशासन कार्यालयका प्रमुख जिल्ला अधिकारी बन्दुप्रसाद बास्तोलाले हस्ताक्षर गरेको उक्त सूचनामा, जिल्लाको शान्ति, सुरक्षा र विकासका कार्यलाई सहज बनाउने उद्देश्यले यो निर्णय गरिएको उल्लेख छ।