जनतापत्र,काठमाण्डौं ।
नेपाल प्रहरीले जारी जेन जी आन्दोलनका क्रममा देशभर ५१ जनाको मृत्यु भएको औपचारिक पुष्टि गरेको छ। प्रहरी सहप्रवक्ता रमेश थापाले दिएको जानकारी अनुसार मृतकमध्ये ३ प्रहरी, १ भारतीय नागरिक र बाँकी सबै नेपाली नागरिक रहेका छन्।
प्रहरीका अनुसार मृत्यु हुनेमध्ये सबैभन्दा बढी शव त्रिवि शिक्षण अस्पताल महाराजगञ्जमा ल्याइएको छ। त्यहाँ ३६ जना मृतकको शव राखिएको छ र आजदेखि ती शवहरूको पोष्टमार्टम प्रक्रिया सुरु भएको छ। यद्यपि, उपत्यकाभित्रका अन्य अस्पतालमा समेत शव रहेका हुनसक्ने आशंका प्रहरीले व्यक्त गरेको छ।
आन्दोलनका क्रममा राजधानीसहित देशका विभिन्न सहरहरूमा व्यापक भिडन्त भएको थियो। सुरक्षाकर्मीले प्रदर्शनलाई नियन्त्रणमा लिन बल प्रयोग गर्दा ठूलो संख्यामा प्रदर्शनकारी घाइते भएका छन्। त्रिवि शिक्षण अस्पतालमा उपचाररत चिकित्सकहरूले घाइतेमध्ये कतिपयको अवस्था गम्भीर रहेको बताएका छन्।
आन्दोलन सुरु भएदेखि नै मृतक र घाइतेको संख्या बढ्दै गएका कारण राजधानीमा सुरक्षा सतर्कता उच्चस्तरमा राखिएको छ। प्रमुख ठाउँहरूमा ठूलो संख्यामा सुरक्षाकर्मी परिचालन गरिएको छ भने आवतजावतमा पनि कडाइ गरिएको छ।
यसअघि आएको प्रारम्भिक विवरणमा मृत्यु हुनेको संख्या फरक–फरक उल्लेख भए पनि आज प्रहरीको आधिकारिक वक्तव्यसँगै कुल मृतक संख्या ५१ पुगेको पुष्टि भएको हो।