जनतापत्र, काठमाडौं – जागिरको लोभ देखाएर अनलाइन ठगी गरेको आरोपमा तीन जना पक्राउ परेका छन्। पक्राउ पर्नेमा सिन्धुपाल्चोकको चौतारा साँगाचोकगढी नगरपालिका–११ का ४० वर्षीय राजन गिरी, ओखलढुंगाको चम्पादेवी गाउँपालिका–८ की २६ वर्षीया मिना लकान्द्री र भारत बिहारका २६ वर्षीय आदित्य कुमार छन्।

प्रहरीको केन्द्रीय साइबर ब्युरोको टोलीले उनीहरूलाई पक्राउ गरेको हो। उनीहरूले फेसबुकमार्फत विभिन्न बैंकका नाममा विज्ञापन पोस्ट गरी “बोनस प्राप्त गर्न सर्भे लिंकमा क्लिक गर्नुहोस्” भनेर प्रयोगकर्तालाई झुक्याउने गरेको प्रहरीको भनाइ छ।

उनीहरूले पठाएको लिंकमा क्लिक गरेपछि प्रयोगकर्ताको बैंक खाताबाट रकम अन्य खातामा सारिने गरेको पाइएकाे साइबर ब्युरोका एसपी तथा प्रवक्ता दीपकराज अवस्थीले जानकारी दिएका छन्।

ठमेलस्थित छायाँ सेन्टरबाट पक्राउ परेका आदित्य कुमारबाट क्यासिनो कार्ड र भारतीय एटीएम कार्डहरू बरामद गरिएको प्रहरीले जनाएको छ। अनुसन्धानका क्रममा उनले ठगीबाट प्राप्त रकम क्यासिनोमा प्रयोग गरेको आशंका गरिएको छ।

पक्राउ परेकाहरूविरुद्ध विद्युतीय माध्यमबाट ठगी गरेको अभियोगमा काठमाडौं जिल्ला अदालतबाट पाँच दिनको म्याद लिई थप अनुसन्धान अघि बढाइएको छ।