आइसिँ तामाङ,चौतारा सिन्धुपाल्चोक ।

सिन्धुपाल्चोक जिल्लाको चौतारा सागाचोकगढी नगरपालिका–१० ले सामाजिक सुरक्षाभत्ता नविकरण जस्तो सेवा लिन कार्यालय धाउनु नपरोस् भनेर उदाहरणीय कदम चालेको छ। नविकरणको समयमा नागरिकले कार्यालय धाउनुपर्ने झन्झट कम गर्न वडा कार्यालयका कर्मचारीहरु आफैँ गाउँघरमा पुगेका छन ।
साउन ८ गते वडा अध्यक्षको नेतृत्वमा वडाका कर्मचारी, सामाजिक सुरक्षा शाखाका प्रतिनिधि, र प्राविधिक टोली जनतालाई सेवा दिनाका लागि सुकुटे र साठिमुडे गाउँमा पुगेका छन । उक्त टोलीले अपाङ्गता भएका व्यक्तिहरू र शारीरिक अशक्तताका कारण हिँडडुल गर्न नसक्ने जेष्ठ नागरिकहरूको घरमै पुगेर सामाजिक सुरक्षाभत्ता नविकरण सेवा प्रदान गरेको छ । यसअघि साउन ५ र ६ गते पनि वडाका अन्य टोलहरूमा पुगेर भत्ता नविकरण तथा वितरण समेत गरिएको थियो।
नविकरणका लागि आवश्यक कागजात संकलन, विवरण प्रमाणीकरण, र डिजिटल प्रणालीमा अभिलेख अद्यावधिक गरी सेवा दिइएको थियो। टोलीले सामाजिक सुरक्षा सेवाको पहुँच गाउँ–गाउँसम्म पुर्याउने प्रयासस्वरूप यस किसिमको कार्यक्रमलाई निरन्तरता दिने प्रतिबद्धता व्यक्त गरेका छन ।