जनतापत्र,सिन्धुपाल्चोक ।
चौतारा साँगाचोगढी नगरपालिका–५ स्थित वृद्धा आश्रम भवनमा २५औं अन्तर्राष्ट्रिय जेष्ठ नागरिक दिवसको अवसर पारेर आयोजित १७औं साधारण सभा तथा सातौं अधिवेशन बुधबार भव्यताका साथ सम्पन्न भएको छ। कार्यक्रमका प्रमुख अतिथि नगरप्रमुख कृष्णप्रसाद सापकोटाले जेष्ठ नागरिकहरूको सम्मान र सेवामा नगरपालिका सदैव प्रतिवद्ध रहेको बताएका थिए। विशेष अतिथि प्रमुख जिल्ला अधिकारी बन्धुप्रसाद बास्तोलाले सरकारले आवश्यक सहयोग उपलब्ध गराउने प्रतिवद्धता व्यक्त गर्दै खर्चिलो र देखावटी कार्यक्रम नगरी सार्थक र सरल कार्यक्रम गर्न आह्वान गरे।
१०२ वर्षीय जेष्ठ नागरिक भक्तबहादुर भण्डारीको विशेष उपस्थितिसहित राष्ट्रिय अनुसन्धान आयोगका प्रमुख सुभाष कार्की, वडा अध्यक्ष शिव श्रेष्ठ, सशस्त्र प्रहरीका प्रमुख अच्युतकुमार मजगैया, जनप्रतिनिधि, विभिन्न संघ–संस्थाका प्रतिनिधि तथा सञ्चारकर्मीहरूको सहभागिता रहेको थियो।
कार्यक्रममा विभिन्न सहयोगी दाताहरूलाई दोसल्ला र सम्मानपत्र प्रदान गरी सम्मान गरिएको थियो। वार्षिक प्रतिवेदन बिना श्रेष्ठले प्रस्तुत गर्दै वृद्धाश्रमले अहिलेसम्म ६१ जना सेवा लिएकामध्ये ३४ जनाको मृत्यु भइसकेको र हाल १५ जना सेवा गरिरहेका जानकारी दिए। वडा अध्यक्ष शिव श्रेष्ठले वडाबाट वृद्धाश्रमका लागि आवश्यक सेवा–सुविधामा निरन्तर सहयोग गर्ने प्रतिबद्धता जनाए।