जनतापत्र,सिन्धुपाल्चोक ।
सिन्धुपाल्चोकको चौतारा साँगाचोकगढी नगरपालिका–१४, मा ‘शुभ जन्मत्सोव पार्क’ निर्माण गरिने भएको छ। नेपाल विद्युत् नियमन आयोगका अध्यक्ष रामप्रसाद धितालले आफ्नो ५४औँ जन्मदिनको अवसरमा सो स्थानमा बिरुवा रोपेर कार्यक्रमको घोषणा गर्नुभएको हो। कार्यक्रममा सहभागीहरुले जन्मदिनलाई समाजिक सदकार्यसँग जोड्ने अभियान अन्तरगत पार्क निर्माणको योजनाबारे जानकारी दिएका हुन्।

९२ वर्षीया पण्डितनी देबकी सिग्देलले अध्यक्ष धिताललाई आशीर्वाद दिँदै माला र दोसल्ला ओढाएर जन्मदिनको शुभकामना प्रदान गरेकी थिइन्। यसअघि असोज ३ गते स्थानीय पत्रकार नेत्रबहादुर बस्नेतको जन्मदिनको अवसरमा सो स्थानमा वृक्षरोपण गरिएको थियो। सोही दिन वडा अध्यक्ष उद्धव नेपालका छोरा उत्सव नेपालको पनि जन्मदिन परेकोले उहाँले पनि बिरुवा रोप्नुभएको थियो।

मंसिर ११ गते अध्यक्ष धितालद्वारा पुनः वृक्षरोपण गरिएपछि पार्क निर्माणको प्रारम्भिक कार्य अगाडि बढाइएको हो। कार्यक्रममा ‘जन्मदिनलाई सत्कर्ममा जोडौँ’ अभियानका राष्ट्रिय संयोजक गोविन्द चौलागाईं विशेष अतिथि रहनुभएको थियो। साथै रामप्रसाद धिताल, गोविन्द चौलागाईं, थापा इन्टरप्राइजेजका प्रोपाइटर भुपेन्द्र थापा, नेत्रबहादुर बस्नेत, निलबहादुर बस्नेत र राजेन्द्र बस्नेतले आरामका लागि बेंच स्थापना गरी सहयोग गरेका छन्। स्थानीयको सहकार्यमा निर्माण हुँदै गरेको पार्कमा राष्ट्रिय कलाकार लालबहादुर अखातीको शालिक पनि निर्माण गरिने जानकारी पत्रकार नेत्रबहादुर बस्नेतले दिनुभयो।