संगिता वुढाथोकी, सिन्धुपाल्चोक ।
“स्थानीय स्रोतको उपयोग, स्वामित्व र सहभागिता ः पूर्णखोप सुनिश्चितता हाम्रो प्रतिबद्धता” भन्ने मूल नाराका साथ चौतारा साँगाचोकगढी नगरपालिका स्वास्थ्य शाखाले “पूर्ण खोप सुरक्षित भविष्य” घोषणा कार्यक्रम सम्पन्न गरेको छ।
नगर सभाहलमा आयोजित कार्यक्रममा चौतारा साँगाचोकगढी नगरपालिकालाई पूर्ण खोप सुनिश्चितता नगर घोषणा गरिएको हो। प्रमुख अतिथि प्रतिनिधिसभा सदस्य माधव सापकोटाको उपस्थितिमा कार्यक्रम सम्पन्न भयो।
विशेष अतिथिका रूपमा जिल्ला समन्वय समितिका प्रमुख बालकृष्ण श्रेष्ठ र जिल्ला जनस्वास्थ्य कार्यालयका प्रमुख दुर्गा बजगाईं रहनुभएको थियो। उहाँहरूले नगर प्रमुख कृष्णप्रसाद सापकोटालाई पूर्ण खोप घोषणाको प्रमाण–पत्र हस्तान्तरण गर्नुभएको थियो।
स्वास्थ्य शाखा प्रमुख दिनेश नेपालका अनुसार, १६ देखि २३ महिनासम्मका ४५८ बालबालिकाले सम्पूर्ण खोप सेवा प्राप्त गरेकाले पूर्ण खोप घोषणा गरिएको हो।
सांसद सापकोटाले दिगो विकास लक्ष्यअनुसार स्वास्थ्य र खोपलाई नैसर्गिक अधिकारका रूपमा स्वीकार गरिएकाले त्यसको सफल कार्यान्वयनप्रति नगरपालिका तथा स्वास्थ्यकर्मीलाई धन्यवाद ज्ञापन गर्नुभयो।
नगर प्रमुख सापकोटाले खोप सुनिश्चितता कार्यान्वयनमा समर्पित स्वास्थ्यकर्मी, महिला स्वयंसेविका र सम्बन्धित पक्षको योगदानको प्रशंसा गर्नुभयो।
कार्यक्रममा उपप्रमुख सीता थापा, प्रमुख जिल्ला अधिकारी किरण थापा, सामाजिक विकास समितिका संयोजक रामप्रसाद गौतम, पत्रकार महासंघ उपाध्यक्ष दीपक अर्याललगायतको उपस्थिति तथा मन्तव्य रहेको थियो।
५ असार २०८२, बिहीबार ११:५५
